رووداو دیجیتاڵ
وەزارەتی بازرگانیی عێراق دەڵێت، لە دوو رۆژی داهاتوودا وەرگرتنی گەنمی جووتیارانی هەرێمی کوردستان دەستپێدەکات. بەرپرسێکی وەزارەتی کشتوکاڵی هەرێمی کوردستانیش دەڵێت، "ئەمڕۆ سیدیی ناوی جووتیاران دەگاتە وەزارەتی بازرگانیی عێراق بۆئەوەی رێکارەکان تەواو ببن و وەرگرتنی گەنم دەستپێبکات."
رۆژی چوارشەممە 04-06-2024 حەیدەر گەرعاوی، بەڕێوەبەری گشتیی کۆمپانیایی گشتیی بازرگانیی دانەوێڵە لە وەزارەتی بازرگانیی عێراق بە تۆڕی میدیایی رووداوی راگەیاند، "سبەی پێنجشەممە یان دوو سبەی هەینی دەست بە وەرگرتنی گەنمی جووتیارانی هەرێمی کوردستان دەکەین."
بەڕێوەبەری گشتیی کۆمپانیای گشتیی بازرگانیی دانەوێڵە دەڵێت، "تاوەکو ئێستا سیدیی ناوی جووتیاران و وردەکاری لەبارەی بڕی گەنم رادەستی وەزارەتی بازرگانیی عێراق نەکراوە، بۆئەوەی دەست بە رێکارەکانی وەرگرتنی گەنمی جووتیارانی هەرێمی کوردستان بکەین."
هاوکات رزگار حەمەد، راوێژکاری وەزارەتی کشتوکاڵی هەرێمی کورستان، کە رۆژی سێشەممە 04-06-2023 بە سەرۆکایەتیی شاندێک لە بەغدا لەگەڵ عەباس مالیکی، وەزیری کشتوکاڵی عێراق کۆبووەوە؛ ئەمڕۆ چوارشەممە بە تۆڕی میدیایی رووداوی گوت، "واژۆمان لەسەر کۆنووسی وەرگرتنی گەنمی جووتیارانی هەرێمی کوردستان کرد و بڕیاردرا 700 هەزار تۆن گەنمی جووتیاران وەربگیرێت."
وەزارەتی بازرگانیی عێراق ئەم ساڵ 700 هەزار تۆن گەنمی هەرێمی کوردستان وەردەگرێت و پارێزگاکانی سلێمانی و هەڵەبجە 282 هەزار و 660 تۆنیان بۆ دیاریکراوە کە دەکاتە 40%ی 700 هەزار تۆنەکە.
لە پارێزگای دهۆک 189 هەزار تۆن وەردەگیرێت کە دەکاتە 27.02%ی 700 هەزار تۆنەکە؛ لە پارێزگای هەولێریش 228 هەزار تۆن وەردەگیرێت کە دەکاتە 32.58%ی 700 هەزار تۆنەکە.
رزگار حەمەد گوتیشی، "سیدیی ناوی جووتیارانی هەرێمی کوردستانمان رادەستی وەزارەتی کشتوکاڵی عێراق کرد. بڕیارە ئەمڕۆ رادەستی وەزارەتی بازرگانی بکرێ بۆ ئەوەی ئەوانیش دەست بە رێکارەکانی وەرگرتنی گەنمی جووتیاران بکەن."
لەبارەی نرخی وەرگرتنی هەر تۆنێک گەنم، نەسرین ئەحمەد عەلی، بەڕێوەبەری بەڕێوەبەرایەتیی بازرگانیی دانەوێڵەی سلێمانی رۆژی سێشەممە 4-6-2024 بە رووداوی گوت: "هەر تۆنێک گەنم بە 850 دینار وەردەگیرێ. گەنمی پلە یەک و پلە دوو وەردەگیرێ. پلە یەک بە 850 هەزار دینار؛ پلە دوو پارەکەی کەمترە، بەڵام نرخەکەی نازانین."
نەسرین ئەحمەد عەلی رایگەیاند، بۆ ئەوەی جووتیاران زۆر لە ریزی وەرگرتنی گەنم لەبەردەم سایلۆکان نەمێننەوە و پارەی زیاتریان نەکەوێتەسەر، وەرگرتنی گەنم بەگوێرەی شوێنەکان دەبێ، واتە هەر رۆژەی شوێنێک دیاری دەکرێ بۆ وەرگرتن گەنمەکانیان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ