پارێزەری شوان ئادەم: تانە لە بڕیاری دادگا دەدەین
رووداو دیجیتاڵ
دوای ئەوەی لە دادگای سلێمانی بڕیاری سێ مانگ زیندانیكردن بۆ د. شوان ئادەم، مامۆستا زانكۆی هەڵەبجە بە تۆمەتی ناوزڕاندنی ناوی كچە هونەرمەندێك دەرچوو، پارێزەری مامۆستاكەی زانكۆ دەڵێت، "تانە لە بڕیارەکە دەدەین". سەرۆكی لقی سلێمانی سەندیكای رۆژنامەنووسانی كوردستانیش دەڵێت، "دەمانزانی دۆسیەكە دەدۆڕێنین."
كاروان ئەنوەر، سەرۆكی لقی سلێمانیی سەندیكای رۆژنامەنووسانی كوردستان ئەمڕۆ چوارشەممە بە تۆڕی میدیایی رووداوی راگەیاند، لەسەرەتاوە هاوكاریی دۆسیەكەی د. شوان بوون و گوتیشی، "دەمانزانی دۆسیەكە دەدۆڕێنین، چونكە دەبوو بە پیت ناوی ئەو كچە هونەرمەندە بهێندرایە، نەوەك راستەوخۆ ناوی بهێندرێت؛ بۆیە دواجار دادگا دژی د. شوان بڕیاریدا و بەبێ جێبەجێكردن سێ مانگ زیندانیكردنی بەسەردا سەپاند."
كارمەند مەحموود، پارێزەری د. شوان لەبارەی هەمان دۆسیە قسەی بۆ رووداو كرد و گوتی، ئەوەی د. شوان كردوویەتی "دوورە لە ناوزڕاندن؛ بۆیە بڕیارەكەی دادگا لە دادگای پێداچوونەوە تەمیز دەكەینەوە."
رووداو پەیوەندیی بە د. شوانەوە كرد، بەڵام قسەی پارێزەرەكەی بە تەواو زانی و ئامادە نەبوو هیچ شتێكی دیكە بڵێت.
پێنج ساڵ لەمەوبەر لە پرسیاری تاقیكردنەوەی خوێندكارانی راگەیاندن لە زانكۆی هەڵەبجە د. شوان ئادەم لە یەكێك لە پرسیارەكاندا ناوی كچە هونەرمەندێكی هێناوە؛ لەسەر ئەوەش كچە هونەرمەندەكە سكاڵای لەسەر تۆمار كردبوو.