کچەکە لەکاتی وێنەگرتن، قاچی خلیسکاوە و کەوتووەتە نێو رووبار.
رووداو دیجیتاڵ
کچێکی 27 ساڵان بەناوی ئاڤێستا، کەوتە نێو رووباری تەنگاتوور لە قەزای مێرگەسۆر و بێسەروشوێنە. باوکی کچەکە لە بەرامبەر ئەو رووبارە وەستاوە کە ئەمرۆ کچەکەی لێ سەند و پڕ بە دەمی هاوار دەکات، "ئەی رووبار ئاڤێستام بدەوە."
فەخرەدین بەرزنجی، مامی ئاڤێستایە و باس لە ساتی رووداوەکە دەکات و دەڵێت، "کاک حوسێن لەگەڵ براژنەکەی و میوانێکی دیکەی لەو ناوچەیە دابەزیون، بۆ وێنەگرتن چوونەتە سەر تاشە بەردێک و قاچی خلیسکاوە. برایەکی هەوڵیداوە بیگرێتەوە، بەڵام بەهۆی لێژی و ساردی ئاوەکە، نەیتوانیوە رزگاری بکات."
رووداوەکە کاژێر 09:50 خولەکی بەرەبەیانی ئەمرۆ روویداوە. بەرزی ئاستی ئاوی رووبار و باران بارینی بەردەوام کاری تیمەکانی بۆ دۆزینەوەی تەرمی ئاڤێستا سەخت کردووە، 7 تیمی بەرگریی شارستانی لەگەڵ کەسوکاری ئەو کچەی ئاو بردوویەتی و خەڵکی سنوورەکە بست بە بستی رووبار دەگەڕێن.
غەفور ئەحمەد، قایمقامی قەزای مێرگەسۆر لەوبارەوە دەڵێت، "لەکاتی روودانی رووداوەکەوە، 7 تیمی بەرگریی شارستانیی بەڕێوەبەرایەتیی شارستانیی سۆران، بەرگریی شارستانیی مێرگەسۆر و دوو تیمی دیکەی مەلەوانی لە گەڕان بەدوای تەرمی ئەو ئافرەتەی خنکاوە دەگەڕێن. ئینشاڵا کەموکوری ناکەین و خودی جەنابی مەلا مستەفا بارزانیش رایسپاردووین ئەوەی پێویست بێت بۆ دۆزینەوەی بیکەین."
ئاڤێستا مامۆستا بووە و لەگەڵ خانەوادەکەی لە هەولێرەوە بۆ سەیران چووبووە دەڤەری بارزان، بەڵام سەیرانی خانەوادەکە بووە شین.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ