سەرۆک بارزانی: ستەم چەند بەهێزیش بێت، ئیرادەی گەلی كوردستان براوە دەبێت

 

 

ئەمڕۆ 34 ساڵ بەسەر دەستپێکی راپەڕینی باشووری کوردستان تێدەپەڕێت کە دامودەزگەی رژێمی بەعسیان وەدەرنا.

 

لە راگەیێندراوەکەی سەرۆک بارزانیدا ئاماژە بەوە کراوە، "بە بۆنەی سی و چوارەمین ساڵیادی راپەڕینە مەزنەكەی گەلی كوردستان پیرۆزبایی لە خانەوادەی سەربەرزی شەهیدان و پێشمەرگە قارەمانەكان و هەموو خەباتگێڕ و ئازادیخواز و نیشتیمانپەروەران و سەرجەم خەڵكی كوردستان دەكەم".

 

ئاماژە بەوەش دەکات، "راپەڕین یەکێکە لە سەروەری و دەستکەوتە گرانبەهاکانی گەلی کوردستان. لە سایەی ئیرادەی ئازادیخوازیی گەلی كوردستان و قارەمانێتی پێشمەرگە و یەكڕیزیی لایەنەكانی ناو بزووتنەوەی رزگاریخوازی كوردستاندا راپەڕین هاتەدی و سەركەوتنی بەدەست هێنا. راپەڕین لە دژی دامودەزگەی ستەمکار و داگیرکەر، پەیامێکی ڕوون بوو کە سەرباری بوونی زوڵم و سەرکوتکاری و تۆقاندن، گەلی كوردستان زیندووە و ئازادی و سەربەستی دەوێت. راپەڕین ئەو راستییەی سەلماند كە داگیركاری و ستەم چەندە بەهێزیش بن، سەرئەنجام هەر كۆتایی دێت و ئەوە ئیرادە و هێزی گەلی كوردستانە كە براوە دەبێت".

 

سەرۆک بارزانی دەشڵێت، "لەو یادە پیرۆزەدا جەخت لە بەها پیرۆزەكانی راپەڕین و پەیامی ئاشتی و برایەتی و پێكەوەژیانی گەلی كوردستان دەكەینەوە. سڵاو بۆ رۆحی بەرزی شەهیدانی راپەڕین و هەموو شەهیدانی خەباتی رزگاریخوازی كوردستان دەنێرین، کە بە خوێنی پاكیان ئازادی و سەربەستیان بۆ گەلەكەمان هێنایە دی".