دەزگای خێرخوازیی بارزانی: لە عەفرین فڕنمان داناوە بۆ دابەشکردنی نان بەسەر زیانلێکەوتووانی بوومەلەرزەدا

 

 

رۆژی یەکشەممە 5ی ئاداری 2023 مووسا ئەحمەد، سەرۆکی دەزگای خێرخوازیی بارزانی بە تۆڕی میدیایی رووداوی گوت، "رۆژانە لە مەرەش لە باکووری کوردستان پاکێجی خواردنی وشک و بەتانی دەدەینە هاونیشتمانیان؛ لە ئامەدیش خواردنی گەرم پێشکێشی خێزانە لێقەوماوەکان دەکەین."

 

سەرۆکی دەزگای خێرخوازیی بارزانی ئاماژەی بەوەش کرد، لە مەرەش و ئامەد و گوندەکانی ئەو پارێزگایانە رۆژانە هاوکاریی زیاتر لە 5000 خێزانی لێقەوماو دەکەن. گوتیشی، "ئێستا زیاتر روو دەکەینە گوندەکان کە دوورەدەستن و پێویستیان بە هاوکاریی زیاترە."

 

قەزای عەفرین و پێنج ناحیەی و 300 گوندی سنوورەکە پێویستیان بە هاوکاریی مرۆییە. سەرۆکی دەزگای خێرخوازیی بارزانی گوتی، "بە بەرنامە هاوکاریی هەموو سنووری عەفرین دەکەین؛ لەنێو عەفریندا فڕنمان داناوە و رۆژانە نان دەکەن و بەبێ بەرامبەر دابەشی دەکەین. هەروەها پاکێجی خواردن و بەتانی دەگەیێنینە گوندەکان کە رۆژانە زیاتر لە 500 خێزان لەو پاکێجانە سوودمەند دەبن."

 

رۆژی دووشەممە 6ی ئادار، مانگێک بەسەر بوومەلەرزە وێرانکەرەکەی باکووری کوردستاندا تێدەپەڕێت، کە کاریگەریی لەسەر رۆژئاوای کوردستان، تورکیا و سووریاش هەبوو، وێڕای گیانلەدەستدان و برینداربوونی دەیان هەزار کەس، دەیان هەزاریش بێ ماڵ مانەوە و پێویستیان بە هاوکاریی مرۆییە.