کەشناسێک: شەپۆلێکی بارانبارین و بەفر هەرێمی کوردستان دەگرێتەوە

 

شەوی پێنجشەممە، 04-01-2024، بەڕێوەبەرایەتیی کەشناسی و بوومەلەرزەزانیی هەرێمی کوردستان لە راگەیێندراوێکدا لەبارەی کەشوهەوای شەوی رابردوو رایگەیاند، " شەوی پێنجشەممە نمە بارانى بچڕ بچڕ بەردەوام لە پارێزگای دهۆک و ناوچە شاخاوییەکانى دەبێت و لە دوای نیوە شەو تا بەرەبەیان ئەگەری هەیە نمە باران درێژە بکێشێت و لە ناوچە شاخاوییەکانى دیکەشدا بەردەوام بێت وەکو سەنتەرى پارێزگاى هەولێر و باکوورى پارێزگای سلێمانى، هاوکات بەفر لە سەر لوتکەى شاخە بەرزە سنووریەکانیش دەبارێت." 

 

لە درێژەی راگەیێندراوەکەدا هاتووە، "بۆ ئێوارە و درەنگانى شەوى هەینى پێشبینیی بارانى کورت خایەنى بە لێزمە بۆ پارێزگای دهۆک و ناوچە شاخاوییەکانى و بەشێک لە ناوچە شاخاوییەکانى هەولێر و ناوچەکانى ئیدارەى راپەڕین و کۆیە دەکرێت، هەروەها لە هەولێر و سلێمانى و هەڵەبجە و گەرمیان و کەرکووک  باران دەبارێت."

 

 

- هەولێر 0.2 ملیمەتر

- پیرمام 0.8 ملیمەتر 

- سلێمانى: دڵۆپ دڵۆپ ملیمەتر  

- دهۆک: 2.2 ملیمەتر 

- زاخۆ: 2.6 ملیمەتر

- ئاکرێ: 1.8 ملیمەتر 

- ئامێدى: 5.4 ملیمەتر

- باتیفا: 4.6 ملیمەتر

- مێرگەسۆر: 4.0 ملیمەتر 

- بامەرنێ: 7.2 ملیمەتر 

- بازیان: 0.2 ملیمەتر

- ماوەت: 0.6 ملیمەتر 

- قەڵادزێ: 0.4 ملیمەتر 

- دووکان: 0.2 ملیمەتر 

- هەڵشۆ: 1.0 ملیمەتر 

- خەبات: 1.2 ملیمەتر

- مانگیش: 3.0 ملیمەتر

- سۆران: 2.0 ملیمەتر 

 

ئاراس جەبار، شارەزای کەشناسی، شەوی پێنجشەممە، 4-1-2024، بەتۆڕی میدیایی رووداوی راگەیاند،" جگە لەم بارانبارینەی ئەمشەو [شەوی پێنجشەممە، 04-01-2024] کە تاوەکو رۆژی شەممە بەردەوام دەبێت، پێشبینی دەکرێت رۆژی 10ـی ئەم مانگە هاوشێوەی شەپۆلی مانگی رابردوو سەپۆلێکی بارانبارینی چڕ سەرجەم ناوچەکانی هەرێمی کوردستان بگرێتەوە و بەفرێکی زۆریش دەبارێت و ئەگەرێکی کەم هەیە بەفر لە سەنتەری چەند شارێکی کوردستان ببارێت."

 

ئاماژە بەوەش دەکات، ئەو شەپۆلە چەند رۆژێک دەخایێنێت و بەردەوام دەبێت و لە چەند کاتێکی دیکەشدا تاوەکو وەرزی بەهار دووبارە شەپۆلی لەو شێوەیە ناوچەکە دەگرێتەوە. هەروەها دەشڵێت، "هێشتا شەپۆلی بارانبارینی دیکەش دەمێنێت، بۆیە بە گشتی ئەم ساڵ بارانی زیاتر لە ساڵی رابردوو دەبارێت."