لە کەرکووک هاونیشتمانییان بۆ هاوخەمیی شەهیدانی شارەکە خۆپێشاندان دەکەن
رووداو دیجیتاڵ
لە گەڕەکی شۆریجەی کەرکووک گردبوونەوەیەک بۆ دەربڕینی هاوسۆزی بۆ کەسوکاری کوژراو و بریندارانی خۆپێشاندانەکەی رۆژی 2ـی ئەیلوول بەڕێوەچوو و هاووڵاتییان داوای بەسزاگەیاندنی بکوژ و تەقەکەرانی خۆپێشاندانەکەیان کرد.
رۆژی دووشەممە، 4ـی ئەیلوولی 2023، لە گەڕەکی شۆریجەی کەرکووک هاووڵاتییان گردبوونەوەیەکیان رێکخست و داوای بەسزاگەیاندنی ئەو کەسانەیان کرد کە بوونەتە هۆکاری کوشتنی چوار خۆپێشاندەر و برینداربوونی ژمارەیەک خۆپێشاندەری دیکە.
هەردی محەممەد، پەیامنێری تۆڕی میدیایی رووداو لە کەرکووک رایگەیاند، گردبوونەوەکە بە هێمنی بەڕێوەدەچێت و هەندێک گەنج ئاڵای کوردستانیان بەرزکردووەتەوە و هێزەکانی پۆلیسی شارەکەش ئەرکی پاراستنی گردبوونەوەکەیان لە ئەستۆ گرتووە.
بەشداربوویەکی گردبوونەوەکە بە روودای گوت، "ئامانجمانە ئەو پەیامە بگەیێنین کە شەهیدەکانمان لە رۆژی خۆپێشاندانەکە ستەمیان بەرامبەر کرا و بکوژانیان بدۆزرێنەوە و بە سزای خۆیان بگەن بۆ ئەوەی خوێنیان بە فیڕۆ نەچێت".