رووداو دیجیتاڵ
بە ئامادەبوونی وەزیری ناوخۆی هەرێمی کوردستان و راوێژکاری ئاسایشی نەتەوەیی عێراق، بەرپرسانی ئەنجوومەنی هەواڵگریی نیشتمانیی عێراق و دەزگا هەواڵگرییەکانی هەرێمی کوردستان لە هەولێر کۆبوونەوە.
نووسینگەی قاسم ئەعرەجی، راوێژکاری ئاسایشی نەتەوەیی عێراق راگەیێندراوێکی لەبارەی کۆبوونەوەکە بڵاوکردەوە و دەڵێت، "رۆژی سێشەممە 4ی حوزەیرانی 2024 ئەنجوومەنی هەواڵگریی نیشتمانی بە ئامادەبوونی سەرکردە و نوێنەرانی دەزگا هەواڵگرییەکانی حکومەتی فیدراڵی و دەزگا هەواڵگرییەکانی هەرێمی کوردستان، کە قاسم ئەعرەجی و رێبەر ئەحمەدیش تێیدا ئامادە بوون، کۆبوونەوە."
لە راگەیێندراوەکەدا هاتووە، "لە کۆبوونەوەکەدا باسی ژمارەیەک بابەت و دۆسیەی گرنگی هاوبەش کرا، لەنێویاندا ئاڵنگارییەکانی تایبەت بە ژمارەیەک دۆسیەی هاوبەش لەنێوان حکومەتی فیدراڵی و هەرێمی کوردستان لەپێناو دۆزینەوەی رێگەچارەی پێویست بۆیان."
لە راگەیێندراوەکەدا ئاماژە بەوەش کراوە، ئامادەبووانی کۆبوونەوەکە "تاوتوێی بەردەوامیی هاوئاهەنگیی هاوبەش، ئاڵوگۆڕی زانیاری و یەکخستنی کاری هەواڵگرییان کرد، تاوەکو گەیشتن بە تەواوکاری لە ئەرکە ئەمنی و هەواڵگرییەکان."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ