رووداو دیجیتاڵ
وەزارەتی بەرگریی تورکیا گیانلەدەستدانی شەش گەریلای پارتی کرێکارانی کوردستان (پەکەکە)ـی لە ناوچەی گارا، لە خاکی هەرێمی کوردستان بڵاوکردەوە. هەپەگە-ش کوژرانی 15 سەربازی لە ناوچەی مەتین راگەیاند.
ئەمڕۆ (شەممە، 4ـی ئایاری 2024) وەزارەتی بەرگریی تورکیا بڵاویکردەوە، فڕۆکە بێفڕۆکەوانەکانیان، جموجۆڵی گرووپێکی گەریلاکانی پەکەکەیان لە ناوچەی گارا بەدیکردووە و شەش گەریلایان کردە ئامانج "لە هێرشێکی ئاسمانیدا لە ناوچەی گارا لە باکووری عێراق، شەش تیرۆریستی پەکەکەی لە ئۆپەراسیۆنی چنگ/قوفڵدا دوای دەستنیشانکردنی جموجۆڵەکانیان، لەنێوبران."
هەر ئەمڕۆ، ناوەندی چاپەمەنی و راگەیاندنی هێزەکانی پاراستنی گەل (هەپەگە) کوژرانی 15 سەرباز و برینداربوونی سێ سەربازی دیکەی لە ئەنجامی دوو هێرشیان بۆ سەر بنکەیەکی سەربازیی هێزەکانی تورکیا، لە ناوچەی مەتین لە خاکی هەرێمی کوردستان بڵاوکردەوە.
رۆژی 18ـی نیسانی 2024، لیوا زەکی ئاکتورک، گوتەبێژی فەرمانگەی پەیوەندییەکان و راگەیاندنی وەزارەتی بەرگریی تورکیا، لە کۆنگرەیەکی رۆژنامەڤانیدا رایگەیاند، زنجیرە ئۆپەراسیۆنەکانی چنگ بەتایبەتی ئۆپەراسیۆنی چنگ-قوفڵ لە هاوینی ئەمساڵ کۆتاییان پێدێت، بەڵام ئۆپەراسیۆنەکان بە رەهەندێکی جیاواز لە دژی پەکەکە لە خاکی هەرێمی کوردستان بەردەوام دەبن.
ئەم شەڕ و پێکدادانە لە چوارچێوەی زنجیرە ئۆپەراسیۆنێکدایە، کە تورکیا ناوی ناوە چنگ. قۆناخی یەکەمی ئۆپەراسیۆنەکە رۆژی 28ـی ئایاری 2019 بەناوی ئۆپەراسیۆنی چنگ-1و2و3 لە ناوچە جیاوازەکانی هەرێمی کوردستان ئەنجامدرا. رۆژی 16ـی حوزەیرانی 2020 ئۆپەراسیۆنی چنگ/پڵنگ لە ناوچەی حەفتانین لە سنووری ئیدارەی زاخۆ بەڕێوەچوو. لە 11ـی تەممووزی 2021 ئۆپەراسیۆنی چنگ/هەورەتریشقە لە ناوچەکانی خواکوڕک، ئاڤاشین و باسییان ئەنجامدرا. ئۆپەراسیۆنی چنگ/قوفڵ-یش لە رۆژی 18ـی نیسانی 2022 لە ناوچەکانی ئاڤاشین، مەتین و زاپ بۆ سەر پێگەکانی پەکەکە دەستیپێکردووە و تاوەکو ئێستاش بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ