مەسرور بارزانی: پێویستە حکومەتی عێراق قەرەبووی کوردانی فەیلی بکاتەوە

 

لە راگەیێندراوێکدا، مەسرور بارزانی، سەرۆکوەزیرانی هەرێمی کوردستان ئاماژەی بەوە کردووە، ئەمڕۆ یادی تاوانێکی هۆڤانە، بەرامبەر بەشێکی گرنگی گەلەکەمان دەکەینەوە، کە شاڵاوەکانی جێنۆسایدکردنی کوردی فەیلییە و رژێمە یەک لە دوای یەکەکانی عێراق، بە چەندین قۆناخ ئەنجامیان دا و لە ساڵی 1980 گەیشتە لووتکەی دڕندەیی. 

 

مەسرور بارزانی دەڵێت، ئەو جینۆسایدە بەهۆی ئەوەوە بووە ئەو کەسانە کورد بوون، "رژێمی پێشووی عێراق... سەدان هەزار کوردی فەیلی لە عێراق دەرکرد و هەزارانیشی بێسەروشوێن کرد، دەستی بەسەر موڵکوماڵ و سامانەکانیاندا گرت و، ناسنامەی لێ سەندن."

 

لە 45 ساڵەی ئەو یادەدا، سەرۆکوەزیرانی هەرێمی کوردستان دووپاتی دەکاتەوە، پێویستە حکومەتی عێراق، ئەرک و بەرپرسیاریەتیی یاسایی و دەستووریی خۆی جێبەجێ بکات و بنەماڵە و کەسوکاری قوربانییانی جینۆسایدی کوردی فەیلی و جێنۆساید و کۆمەڵکوژییەکانی دیکە، بە شێوەیەکی شایستە، قەرەبوو بکاتەوە و، موڵک و ماڵە زەوتکراوەکانیان بۆ بگەڕێنێتەوە.

 

جینۆسایدی کوردانی فەیلی لە عێراق بە چەندین قۆناخ دەستی پێکردووە و لەسەردەمی پاشایەتییەوە تاوەکو رژێمی بەعس. گەورەترین قۆناخی لە سەردەمی رژێمی بەعسدا بوو، دوای ئەوەی لە ساڵی 1980 بەپێی بڕیاری 666ـی بەعس کوردانی فەیلی لە ماڵ و حاڵییان دەرکران و بێبەشکران و بڕیاردرا هەموو موڵکەکانیان لێوەربگیرێت.

 

بەپێی ئامارەکان لە هەشتاکانی سەدەی رابردوو، زیاتر لە 22 هەزار گەنجی فەیلی بێسەروشوێنکران، 5000 کاسبکار و بازرگانی فەیلی زیندەبەچاڵ کراون. هەروەها 600 هەزار کوردی فەیلی لە عێراق بۆ ئێران دەرکران، ئەوە جگە لە گیانلەدەستدانی چەندین کەسیان لە رێگەی دەربەدەریدا.