خوێندنی باڵا چەند بڕیارێکی 'گرنگ لە بەرژەوەندیی' خوێندکارانی ماستەر و دکتۆرا دەردەکات

 

 

رۆژی سێشەمە 04-04-2023 بە سەرپەرشتیى د. ئارام محەممەد قادر، وەزیرى خوێندنى باڵا و توێژینەوەى زانستى، کۆبوونەوەى ژمارە 1ى ساڵى 2023ى ئەنجوومەنى وەزارەت بە ئامادەبوونى بریکارى وەزارەت و سەرجەم سەرۆکی زانکۆ حکومییەکانى هەرێمى کوردستان و راوێژکار و بەڕێوەبەرانى گشتى بەڕێوەچوو.

 

لە سەرەتاى کۆبونەوەکەدا، وەزیرى خوێندنى باڵا و توێژینەوەى زانستى ئاماژەى بە کۆى پڕۆژە و بەرنامە ستراتیژیەکانى وەزارەتەکە کردووە، لەو چوارچێوەیەشدا ئاماژەى بە "راگەیاندنى راوندى دووەمى خوێندنى باڵا/ ماستەر، دکتۆرا، دبلۆمى باڵا لە زانکۆ حکومییەکانى هەرێمى کوردستان بۆ ساڵى خوێندنى 2023 - 2024 کرد" و سەرۆک زانکۆکانى راسپارد، کە پێویستە کار بکەن بۆ سەرخستنى ئەو پرۆسە ئەکادیمیە و چەسپاندنى بنەماکانى (شەفافیەت، دادپەروەرى، هەلى یەکسان) لە پرۆسەکەدا.

 

د. ئارام محەممەد پێشکەشکاران دڵنیا دەکاتەوە، "بە وردى چاودێریى پرۆسەکە دەکرێت تاوەکو پێشکێشکاران مافیان نەخورێت و جیاوازى نەکرێت لە نێوایاندا."

 

 

１- دامەزراندنى سێنتەرى راوێژکارى خوێندکاران/ قوتابیان لە سەرجەم لە زانکۆ حکومییەکانى هەرێمى کوردستان، کە ئامانج لە دامەزراندنى ئەم سێنتەرە بریتیە لە پشتیوانی کردن و رێنوێنی کردنى خوێندکاران/ قوتابیان لەڕووی رێنوێنی یاسایی و دەروونی و پەروەردەیی و چارەسەرکردنی گرفتەکانیان، ئەم سێنتەرە راوێژکارییە تەنها تایبەت دەبێت بە کاروبارى قوتابیان و خوێندکاران و کەسێک بە پلەى بەڕێوەبەر بەڕێوەى دەبات.

２- یەکەم و دووەم و سێیەمى زانکۆ حکومیەکانى هەرێمى کوردستان کە دانەمەزراون، لە تەواوى کرێى خوێندنى ساڵانە بە رێژەى (100%) دەبەخشرێن ئەگەر هاتوو لە خوێندنى ماستەر لە زانکۆ حکومییەکانى هەرێمى کوردستان بۆ ساڵى خوێندنى (2023 - 2024) وەرگیران.

３- کەسوکارى پلە (1)ى شەهیدان و ئەنفالکراونى هەرێمى کوردستان لە کاتى پێشکەشکردن بۆ خوێندنى باڵا/ ماستەر، دکتۆرا، دبلۆمى باڵا لە زانکۆ حکومیەکانى هەرێمى کوردستان بۆ ساڵى خوێندنى (2023 - 2024)، کورسى خوێندنیان لە دەرەوەى پلان بۆ تەرخان دەکرێت بە مەرجى دەرچوون لە تاقیکردنەوەى توانستى زانستى، هەروەها لەکاتى دەرچون و وەرگیرانیان لە خوێندن، ناوبراوان مۆڵەتى خوێندنیان لە دەرەوەى پلانى پەسەندکراو پێ دەدرێت و ناچنە کێبڕکێى پلانى مۆڵەتى خوێندن لە سەرجەم دامودەزگاکانى سەر بە وەزارەتى خوێندنى باڵا و توێژینەوەى زانستى.

４- نابینایان بە رێژەى (100%) لەگەڵ خاوەن پێداویستی تایبەت، لە کاتى پێشکەشکردن بۆ خوێندنى باڵا/ ماستەر، دکتۆرا، دبلۆمى باڵا لە زانکۆ حکومیەکانى هەرێمى کوردستان بۆ ساڵى خوێندنى (2023 - 2024)، کورسى خوێندنیان لە دەرەوەى پلانى پەسەندکراو بۆ تەرخان دەکرێت بە مەرجى دەرچوون لە تاقیکردنەوەى توانستى زانستى.

５- تاقیکردنەوەى توانستى زانستى بۆ خوێندنى باڵا/ ماستەر، دکتۆرا، دبلۆمى باڵا، لەلایەن زانکۆکان ئەنجام دەدرێت کە پێویستە رەچاوى بنەماکانى دادپەروەری و شەفافیەت و یەکسانی بکرێت و دوور لە هەر مەنسوبیەت و مەحسوبیەتێک پرۆسەکە چاودێری و جێبەجێ بکرێت.

６- فەرمانبەرانى دامەزراوى حکومى ئەگەر هاتوو تاوەکو رێکەوتى (01-09-2023) دوو ساڵ بەسەر خزمەتى کردەکى لە راژە پاش وەرگرتنى دوایین بروانامەى پەسەندکراو تێپەربێت، بۆیان هەیە داواکارى پێشکەش بکەن بۆ خوێندنى باڵا/ ماستەر یان دکتۆرا.

７- ئەنجومەنى وەزارەت جەختى کردەوە کە پرۆسەى خوێندنى باڵا/دکتۆرا و ماستەر و دیبلۆمى باڵا لە زانکۆ حکومیەکانى هەرێمى کوردستان ساڵانە بکرێتەوە، تاوەکو دەرفەت بۆ پێشکەشکاران بڕەخسێندرێت درێژە بە خوێندنى باڵا بدەن.

８- ئەنجومەنی وەزارەت بڕیاریدا بە دروستکردنی کارتی زیرەک (سمارت کارت) بۆ سەرجەم خوێندکاران و قوتابیانی زانکۆ و پەیمانگاکانی هەرێمی کوردستان بۆ بە ئەلکترۆنی کردن و ئاسان جێبەجێکردنی کاروبارە دارایی و کارگێرییەکانی قوتابیان و خوێندکاران.