بەرگریی شارستانیی هەولێر: کەسێک بەهۆی ئاگرکەوتنەوە لە هۆتێلێک تووشی تەنگەنەفەسی بوو
رووداو دیجیتاڵ
لە شەقامی 100 مەتری هەولێر، ئاگر لە هۆتێلێک کەوتەوە و بەرگریی شارستانیش دەڵێت، خەڵکێکی زۆر لەنێو هۆتێلەکە بوون و هەموویانیان رزگارکردوون و تەنیا کەسێک تووشی تەنگەنەفەسی بووە.
ئێوارەی رۆژی شەممە 04-02-2023 لە شەقامی 100 مەتریی هەولێر، ئاگر لە هۆتێلێک کەوتەوە و گوتەبێژی بەرگریی شارستانیی هەولێریش وردەکارییەکەی راگەیاند.
سەرکەوت کاڕەش، گوتەبێژی بەرگریی شارستانیی هەولێر بە رووداوی راگەیاند: "ئاگرەکە لە ژوورێکی نهۆمی شەشەمی باڵەخانەکە کەوتووەتەوە، بەهۆیەوە سێ ژووری ئەو نهۆمە و رێڕەوی نهۆمی حەوتەمی هۆتێلەکە سووتاون. ئێستا ئەفسەرەکانی بەرگریی شارستانی دەستیان کردووە بە لێکۆڵینەوە لە هۆکاری کەوتنەوەی ئاگرەکە."