رووداو دیجیتاڵ
بریاری دەستبەسەرداگرتنی ئۆتۆمبێلە بێ سەرەتاکان گۆڕانکاری بەسەردا هاتووە. ئاسایشی سلێمانی دەڵێت، لە هەر شوێنێک بیانبینن، دەستیان بەسەردا دەگرن.
بە گوتەی بەرپرسێک لە ئاسایشی سلێمانی کە قسەی بۆ رووداو کرد، لە سەرەتای ئەم مانگەوە گۆڕانکاری بەسەر بڕیاری دەستبەسەرداگرتنی ئۆتۆمبێلی بێ سەرەتادا هاتووە؛ ئاماژەی بەوەشکرد، پێشتر بڕیارەکە بەو جۆرە بوو کە ئەگەر ئۆتۆمبێلەکان بکەونە خاڵی پشکنینی تیمەکانیانەوە دەستیان بەسەردا دەگیرێت، بەڵام "لەمەودوا لەهەر شوێنێک بیانبینین، دەستیان بەسەردا دەگرین".
بە گوێرەی گرتە ڤیدیۆییەک کە بۆ رووداو نێردراوە، لە سەرکارێزی سلێمانی، ئۆتۆمبێلێكی ئاسایش لێپێچینەوە لە ئۆتۆمبێلێکی بێ سەرەتا دەکات، لەکاتێکدا هیچ تیمێک دانەنراوە و ئەو ئۆتۆمبێلەی ئاسایش لە گەڕانی شەوانەیدا ئۆتۆمبێلە بێ سەرەتاکەی بینیوە و رایگرتووە.
2ی کانوونی یەکەمی 2024، لیژنەی ئەمنیی سلێمانی رایگەیاند، ئیدی رێگەنادەن ئۆتۆمبێلی بێ سەرەتا بسوڕێتەوە و دەستیان بەسەردا دەگرن.
لەو کاتەوە تاوەکو کۆتایی ساڵی 2024 تیمی گەڕۆک کە پێکهاتبوون لە ئاسایش، پۆلیس و پۆلیسی هاتووچۆ لە رێگەکان بوون.
پێشتریش عەمید ئاسۆ محەممەد، بەڕێوەبەری گشتیی هاتووچۆی سلێمانی بە رووداوی گوتبوو، لە رۆژی جێبەجێکردنی بڕیارەکەوە (2ی کانوونی یەکەمی 2024) تاوەکو 23ی کانوونی یەکەمی 2024 نزیکەی 100 ئۆتۆمبێل دەستی بەسەرداگیراوە و رۆژانەش ژمارەکە زیاد دەکات.
ئەو سەرچاوەیەی ئاسایش بە رووداوی گوت، هۆکاری تووندکردنی رێکارەکانیان ئەوەیە کە رێگە نەدەن ئوتومبێلی "نایاسایی لە رێگەکان بسورێنەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ