یەکێتیی پیاوان: لە 2021ـدا 521 پیاو دژی تووندوتیژی سکاڵایان تۆمارکردووە

 

ئەمڕۆ سێشەممە 04-01-2022، بورهان عەلی، سەرۆکی یەکێتیی پیاوانی کوردستان لە کۆنگرەیەکی رۆژنامەڤانیدا ئاماری کار و چالاکیی یەکێتییەکەیانی بۆ ساڵی 2021 لە سەرجەم پارێزگاکانی هەرێمی کوردستان و پارێزگای کەرکووک خستەڕوو.

 

بە گوتەی سەرۆکی یەکێتییەکە، لە ماوەی ساڵەکەدا "521 جۆری سکاڵا و تووندوتیژی لە سەرجەم لق و ناوچەکانمان تۆمارکراون".

 

بورهان عەلی دەڵێت: "68 حاڵەتی خۆکوشتنی پیاوان تۆمارکراوە، لەگەڵ 6 حاڵەتی کوشتنی پیاوان لەلایەن ژنان بە هاوکاری کەسانی دیکە".

 

سەبارەت بە جۆری سکاڵاکان و ئەو تووندوتیژییانەی لە ساڵی 2021دا لە لایەن تۆمارکراوە، بەم شێوەیەی خوارەوەیە:

 

31 دەرکردنی پیاوی بەتەمەن

47 خیانەتی هاوژینی

8 تووندوتیژی جەستەیی

199 دەستوەردانی کەسوکار لە ژیانی هاوژینیدا

11 حاڵەتی گوشاری دەروونی و سێکسی و ئابووری

6 حاڵەتی دەستبەسەرداگرتنی مووچە

219 حاڵەتی دەستبەسەرداگرتنی منداڵ دوای جیابوونەوە

 

سەبارەت بە خۆکوشتنی پیاوان، بەمشێوەیە بەسەر پارێزگاکان دابەشبووە:

 

24 لە پارێزگای هەولێر

28 لە پارێزگای سلێمانی بە هەردوو ئیدارەی گەرمیان و راپەڕین

9 لە پارێزگای دهۆک

5 لە پارێزگای کەرکووک

2 لە پارێزگای هەڵەبجە

 

بورهان عەلی ئاماژە بەوە دەدات، ئامارەکە بەراورد بە ساڵی رابردوو "رێژەیەکی کەم دابەزینی بەخۆوە بینیوە بە جۆرێک لە ساڵی 2020دا، 553 جۆری سکاڵا و تووندوتیژی و 91 خۆکوشتنی پیاوان و 8 کوشتنی پیاوان لەلایەن ژنان بە هاوکاریی کەسانی دیکە هەبووە".