رووداو دیجیتاڵ
وەزارەتی دارایی و ئابووری هەرێمی کوردستان رایگەیاند، وەزیری دارایی و ئابووری مووچەی زیاتر لە 10 هەزار مووچەخۆری نا یاسایی بڕی کە لە سیستەمی بایۆمەتری دووجار یان زیاتر ناویان تۆمارکراوە.
پاڵپشت بە یاسای چاكسازی ژمارە (2) ساڵی (2020) و پەیڕەوی جێبەجێكردنی یاسای چاكسازی لە مووچە و دەرماڵە و ئیمتیازاتەكان و خانەنشینی لە هەرێمی كوردستان بڕیاردرا بە:
- راگرتنی مووچە و خانەنشینی 10 هەزار و 609 مووچە خۆر كە لە سیستەمی بایۆمەتری دووجار یان زیاتر ناویان تۆماركراوە وەك لە خشتەی خوارەوە هاتووە كە ژمارەیان 21 هەزار و 588 دۆسیەیە و بە نایاسایی مووچە وەردەگرن کە لە لیستی هاوپێچ ناو و لە دایکبوون و مووچە و ناونیشان و شوێنی کارکردنیان هاتووە.
- ئەو فەرمانبەرانەی لە دوو شوێن فەرمانبەرن ژمارەیان 791 فەرمانبەرە، لە هەزار و 639 کەیس مووچە وەردەگرن.
- ئەو فەرمانەبەرانەی کە بەردەوامن لە کار و مووچەی خانەنشینی وەردەگرن بە هەر هۆکارێک بێت ژمارەیان سێ هەزار و 909 مووچەخۆرن لە هەشت هەزار و 147 کەیس مووچە وەردەگرن.
- هەر مووچە خۆرێك لەم بڕیارە زەرەرمەندبێت دەتوانێت لە ماوەیەكی دیاریكراودا لەڕێگەی لایەنی پەیوەندیدار یان فەرمانگەكەی تانە لە بڕیارەكە بدات.
رۆژی 8-7-2020 قۆناخی دووەم و سێیەمی سیستەمی بایۆمەتری چووە بواری جێبەجێكردنەوە. د.عەبدولحەكیم خەسرۆ، سكرتێری لیژنەی باڵای جێبەجێكردنی یاسای چاكسازی لە ئەنجوومەنی وەزیران بە رووداوی راگەیاندبوو کە قۆناخی دووەم و سێیەمی سیستەمی بایۆمەتری سوودی زۆری دەبێت بۆ رێكخستنەوەی سیستەمی میلاكاتی وەزارەتەكان و رێكخستنەوە سیستەمی مووچە و نەهێشتنی ئەوەی پێدەگوترێ "بندیوار".
قۆناخی یەکەمی تۆماری بایۆمەتری لە ساڵی 2016 دەستیپێکرد، لە قۆناخی یەکەمدا ناوی یەک ملیۆن و 250 هەزار فەرمانبەر و مووچەخۆر لە سیستمەکەدا تۆمارکران. سیستمەکە توانای تۆماركردنی 30 ملیۆن كەسی هەیە.
سەفین غەفوور، بەڕێوەبەری جێبەجێكاری تۆماری بایۆمەتری پێشتر بە رووداوی گوتبوو، کە تێچووی قۆناخی یەکەمی بایۆمەتری سێ ملیار دینار بووە. سەبارەت بە قۆناخی دووەم و سێیەمیش گوتبووی "18 مانگمان بۆ جێبەجێكردنی هەردوو قۆناخەكە داناوە و داوای پێنج ملیۆن دۆلاریشمان كردووە".
یاسای چاكسازی لە 19 ماددە پێكهاتووە و لە 16-01-2020 لەلایەن پەرلەمانی كوردستان پەسەندكرا و 3- 2-2020 نێچیرڤان بارزانی، سەرۆكی هەرێمی كوردستان واژۆی لەسەر كرد.
بەپێی راپۆرتی یەکەمی یاسای چاکسازی، لە هەرێمی کوردستاندا 106 هەزار و 839 کەس زیاتر لە یەک مووچە و ئیمتیاز وەردەگرن، ئەم کەسانە سەرپشک دەکرێن بە وەرگرتنی یەکێک لەو مووچە یان ئیمتیازانە.
سەعید مستەفا، ئەندامی لیژنەی دەستپاکی لە پەرلەمانی کوردستان بە رووداوی راگەیاندبوو، کە نزیکەی 106 هەزار کەس زیاتر لە یەک مووچە وەردەگرن، رەنگە لەو ژمارەیە تێیاندا بێت کە سێ مووچە، چوار مووچە و تاوەکو هەشت مووچە وەربگرن.
سەعید مستەفا لەبارەی دوو مووچەیی لە هەرێمی کوردستان رایگەیاند، "بەپێی راپۆرتی حکومەت لە هەموو وەزارەتەکان دوو مووچەیی هەیە، بەڵام دیار نییە کامەیان زیاترە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ