لە وان 17 کەس بە تۆمەتی پەکەکە دەستبەسەرکران
رووداو دیجیتاڵ
لە پارێزگای وان ـی باکووری کوردستان لە ماوەی یەک هەفتەدا 17 کەس بە تۆمەتی ئەندامێتی و هاوکاریکردنی پارتی کرێکارانی کوردستان-پەکەکە دەستبەسەرکران.
بە گوێرەی راگەیێندراوی بەڕێوەبەرایەتیی ئاسایشی وان، هێزە ئەمنییەکانی پارێزگاکە لە رۆژانی 24ـی تشرینی دووەم بۆ یەکی کانوونی یەکەمی 2024 لە چوارچێوەی بەرەنگاربوونەوەی چالاکییەکانی پەکەکە لە سنووری پارێزگای وان ئۆپەراسیۆنیان کردووە و 17 کەسیان بە تۆمەتی ئەندامێتی و هاوکاریکردنی پەکەکە دەستبەسەرکردووە.
بەگوێرەی ئاسایشی وان، لێکۆڵینەوە لەگەڵ ئەو دەستبەسەرکراوانە دەستیپێکردووە.
لە تورکیا و باکووری کوردستان رۆژانە هێزە ئەمنییەکان هەڵدەکوتنە سەر ماڵان و بە تۆمەتی پەکەکە، هاووڵاتییانی مەدەنی و چالاکڤانان و سیاسەتڤانانی کورد دەستگیر دەکەن.