ماڵپەڕی شەفافیەت: داهاتی یەک مانگ زیاتر لە 110 ملیار دینار بووە

 

رۆژی هەینی 03-11-2023 ماڵپەری شەفافیەت بڵاویکردەوە، لە 28ـی تشرینی یەکەم تاوەکو ئەمڕۆ داهاتی یەک هەفتەی سنووری پارێزگاکانی سلێمانی و هەڵەبجە، ئیدارە سەربەخۆکانی گەرمیان و راپەڕین 27 ملیار و 276 ملیۆن و 907 هەزار و چوار دینار بووە کە 94٪ـی نەختینە، 6٪ـی چەک و مەقاسە سفر بووە.

 

هاوکات لە 03ـی مانگی رابردوو تاوەکو ئەمڕۆ 03ـی تشرینی دووەم واتا داهاتی یەک مانگی سنووری پارێزگاکانی سلێمانی و هەڵەبجە، ئیدارە سەربەخۆکانی گەرمیان و راپەڕین، 110 ملیار و 128 ملیۆن و 359 هەزار و 437 دینار بووە، کە زۆرترین پارە لە رێگەی گەنجینەی ژمارە یەک کۆکراوەتەوە و کەمترینی لە گەنجینەی هەڵەبجە بووە، کە لە یەک مانگدا تەنیا 97 ملیۆن و 36 هەزار و 400 دینارە. 

 

ئەو داهاتەی ماڵپەڕی شەفافیەت بڵاوی دەکاتەوە، داهاتی نانەوتییە و لە رێگەی شەش گەنجینە (گەنجینەی دوو، گەنجینەی یەک، گەنجینەکانی گەرمیان، راپەڕین، چەمچەماڵ و هەڵەبجە) کۆکراوەتەوە. 

 

قوباد تاڵەبانی، جێگری سەرۆکی حکومەتی هەرێمی کوردستان رۆژی 15-12-2022 لە پەیامێکی ڤیدیۆییدا ماڵپەڕی شەفافیەتی راگەیاند.

 

ماڵپەڕی شەفافیەت لە هەشت بەش پێکدێت و لەلایەن نووسینگەی جێگری سەرۆکی حکومەتەوە سەرپەرشتی دەکرێت و دروشمی "بە سیستمکردن و دیجیتاڵکردنی خزمەتگوزارییەکانی هاووڵاتییان لە دامودەزگاکانی حکومەت"ـی بەرزکردووەتەوە.