قایمقامی هەریر: یاریگەیەکی مۆدێرن بە گوژمەی 722 ملیۆن دینار دروست دەکرێت

 

 

شێروان جەلال، قایمقامی قەزای هەریر بە وەکالەت میوانی بەرنامەی مژار بوو لە رادیۆی رووداو، باسی لە پرۆژە خزمەتگوزارییەکان و کێشە و گرفتەکانی شارەکەی کرد و گوتی، لە ماوەی چوار ساڵی رابردوودا شەش پرۆژەی گرنگ لە ناوەندی قەزای هەریر بە بەهای 3 ملیار و 879 ملیۆن دینار لەسەر بوودجەی پارێزگای هەولێر جێبەجێکراون.

 

گوتیشی لەسەر بودجەی وەزارەتی شارەوانی پرۆژەی کۆنکرێت و رێگەسازی گەڕەکەکانی شارەکە بە گوژمەی 400 ملیۆن دینار جێبەجێکراوە.

 

لەبارەی جۆری پرۆژەکان ئاماژەی بەوەکرد، ئەو پرۆژانەی جێبەجێکراون لە سێکتەرە جیاوازەکانی وەکو ئاو و ئاوەڕۆ، رێگەسازی و دروستکردنی شەقام و شۆستە و پارک بوون و ئێستا نزیکەی 80٪ی شارەکە خزمەتگوزاری بۆ جێبەجێکراوە.

 

شێروان جەلال ئاماژەی بەوەشکرد، لە ماوەی رابردوودا پارکێکی گەورە لە لایەن نێچیرڤان بارزانی، سەرۆکی هەرێمی کوردستان کرایە دیاری بۆ شارەکە و بە گوژمەی نزیکەی ملیارێک و 450 ملیۆن دینار جێبەجێکراوە لەسەر رووبەری 32 هەزار مەتر دووجا.

 

لەبارەی ئەو پرۆژانەی کە ئێستا لە قۆناخی جێبەجێکردنن، یان رەزامەندییان لەسەردراوە، قایمقامی هەریر گوتی، ئێستا پرۆژەی تۆڕی ئاو و ئاوەڕۆ و قیرتاوکردن لە گەڕەکی فەرەنسۆ هەریری جێبەجێدەکرێت، کە گوژمەکەی نزیکەی 800 ملیۆن دینارە، هەروەها دوێنێ بڕیاردرا بە دروستکردنی یاریگەیەکی مۆدێرن، بە گوژمەی 722 ملیۆن دینار و هەفتەی داهاتووش بەردی بناخەی بنکەیەکی وەرگرتنی گەنم دادەنرێت.

 

قەزای هەریر و ناحیەی باسرمە بۆ پرۆژەکانی بوودجەی پەرەپێدانی پارێزگاکان داوای نزیکەی چوار ملیار دیناریان کردووە، شیروان جەلال گوتی، "لە پلانی پەرەپێدانی ساڵی 2024، داوای 3 ملیار و 800 ملیۆن دینارمان کردووە بۆ جێبەجێکردنی پرۆژەی خزمەتگوزاری لە قەزای هەریر و ناحیەی باسرمە".

 

لەبارەی چارەسەرکردنی گرفتەکانی زێدەڕۆیی لە شارەکەدا، قایمقامی هەریر دەڵێت، ئێستا فەرمانی وەزاریمان هەیە بۆ دووبارە دانانەوە و چاککردنی نەخشەی کەرتی و ماستەرپلان و رووپێوی ئاسمانی (درۆنی)، ئەوەش یارمەتیدەر دەبێت بۆ چارەسەری گرفتی زێدەڕۆیی.

 

بەڵام بەگوتەی شێروان جەلال، بەهۆی فڕۆکەخانەی هەریر، ناوچەکەیان بە ناوچەی سوور (Red Zone) هەژمارکراوە و ئێستا سەرقاڵی وەرگرتنی رەزامەندی لایەنی ئەمنین و پاشان رووپێوی ئاسمانی بۆ قەزاکە دەکەن.

 

چەند هاونیشتمانییەکی دانیشتووی گوندی سەرکەند خەیلانی لە سنووری قەزای هەریر، پەیوەندییان بە بەرنامەی مژار کردووە و دەڵێن، رێگەی گوندەکەیان خراپە و داواکارن چارەسەر بکرێت.

 

قایمقامی هەریر دەڵێت، "نزیکەی 95٪ی گوندەکانی سەر بە قەزای هەریر، رێگەوبانیان بۆ جێبەجێکراوە و تەنیا یەک گوند رێگەی نییە کە گوندی (سۆکە)یە و لە پلانی 2024 داوای 224 ملیۆن دینارمان کردووە. بۆ چارەسەرکردنی گرفتی رێگەی گوندی سەرکەند خەیلانیش نووسرامان بۆکردووە، لە ئەنجوومەنی وەزیرانە و چاوەڕوانی رەزامەندین".