جارێکی دیکە بۆریی ئاوی ئیفراز سێ لە هەولێر شكا

 

ئەندازیار هیوا عەبدولڕەزاق، بەڕێوەبەری پڕۆژەی ئاوی ئیفراز 3ـی هەولێر ئەمڕۆ پێنجشەممە بە تۆڕی میدیایی رووداوی گوت، "بۆرییەکە جۆری فایبەر گڵاسە و لە ناو عەینکاوەدا شکاوە."

 

بەڕێوەبەری ئیفراز سێ گوتی، هەر ئەمڕۆ تیمەکانی چاککردنەوە بۆرییەکە چاک دەکەنەوە. گوتیشی، "بۆ دابەشکردنەوەی ئاو و ئاساییبوونەوەی دۆخەکە 48 کاژێرمان پێویستە."

 

پڕۆژەکانی ئیفراز لە هەولێر نیوەی ئاوی خاوێنی سنوورەکە دابین دەکەن. تەنیا پڕۆژەی ئاوی ئیفراز سێ سەرچاوەی سەرەکیی نزیکەی 40 گەڕەکی شاری هەولێرە کە دەکاتە 40%ـی دانیشتووانی شارەکە.

 

جگە لە پڕۆژەکانی ئیفراز، هەولێر پشت بە ئاوی بیرەکان دەبەستێت. بە گوتەی بەڕێوەبەری ئیفراز سێ، 50%ـی دانیشتووانی هەولێر پشت بە ئاوی بیرەکان و ئاوی ژێر زەوی دەبەستن.

 

هەولێر سێ پڕۆژەی ئاوی ئیفرازی هەیە، ئیفراز یەک کە ساڵی 1967 دروستکراوە، ئیفراز دوو ساڵی 1982 و ئیفراز سێ ساڵی 2007 کەوتووەتە کار.