کۆمیسیۆن: تەنیا سەرۆکایەتیی هەرێمی کوردستان دەتوانێت هەڵبژاردن دوابخات

راوەر ئازاد، ئەندامی هۆبەی یاسایی لە دەستەی هەڵبژاردنەکانی هەرێمی کوردستان لە کۆمیسیۆنی باڵای سەربەخۆی هەڵبژاردنەکانی عێراق، بە تۆڕی میدیایی رووداوی راگەیاند، "بەدڵنیاییەوە ئەگەر دۆخی ناوچەکە تێکبچێت و لە عێراق باری نائاسایی رابگەیێندرێت، کاریگەری لەسەر هەڵبژاردن دەبێت، بەڵام ئێمە وەکو کۆمیسیۆن نە بە بڕیاری خۆمان دەستمان بە ئامادەکاری کردووە و نە بە بڕیاری خۆشمان دوای دەخەین."

 

راوەر ئازاد روونیکردەوە، کە "کۆمسیۆن بە مەرسوومێکی سەرۆکایەتیی هەرێمی کوردستان، دەستمان بە ئامادەکاری بۆ هەڵبژاردن کردووە و دەکرێت بڵێین ئامادەکارییەکان تەواوبوون، ئەگەری دواخستنی هەڵبژاردن لە هەر بارودۆخێکدا بڕیارەکەی لای سەرۆکایەتیی هەرێمی کوردستانە و ئەو بڕیارە لە دەسەڵاتی کۆمیسیۆن دا نییە."

 

رۆژی 29ـی ئەیلوول، جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە رووداوی گوت، "ئەو شەڕ و ئاڵۆزییانەی لە رۆژهەڵاتی نێوەڕاست و ناوچەکەدا روودەدەن، هیچ کاریگەرییەکیان لەسەر ئامادەکارییەکانی کۆمیسیۆن نابێت و هەڵبژاردن لەکاتی دیاریکراوی خۆیدا دەکرێت."

 

نێچیرڤان بارزانی، سەرۆکی هەرێمی کوردستان، رۆژی 20ـی تشرینی یەکەمی ئەم ساڵی بۆ بەڕێوەچوونی هەڵبژاردنی پەرلەمانی کوردستان دیاریکردووە.

 

لە مەرسوومەکەدا جگە لە دیاریکردنی رۆژی هەڵبژاردن، ئەوە هاتووە کە دەبێت لایەنە پەیوەندیدارەکان هاوئاهەنگی لەگەڵ کۆمیسیۆنی باڵای سەربەخۆی هەڵبژاردنەکانی عێراق بکەن بۆ جێبەجێکردنی مەرسوومەکە.