لە کۆیە گوللـە هاوەنێکی سەردەمی بەعس بە مێرمنداڵێکدا تەقییەوە؛ چاوێکی لەدەستدا

ئەمڕۆ (شەممە، 3ـی ئابی 2024) شێروان جەلال، جێگری بەڕێوەبەری تەندروستیی کۆیە بە رووداوی راگەیاند، "دوانیوەڕۆی ئەمڕۆ لە نزیک بارەگاکانی حیزبی دیموکراتی کوردستانی ئێران لە کۆیە، مێرمنداڵێک بەناوی عەبدولرەحمان عەبدولخالق، کە تەمەنی 12 ساڵە و لە خێزانە رەوەندەکانە، دەستکاریی گوللـە هاوەنێکی سەردەمی بەعسی کردووە، لە ئەنجامدا پێیدا تەقیوەتەوە."

 

گوتیشی، "مێرمنداڵەکە چاوێکی لەدەستداوە و دەست و قاچەکانیشی بریندار بوون، دوای فریاگوزاریی سەرەتایی، رەوانەی نەخۆشخانە لە هەولێر کراوە."

 

بەگوێرەی زانیارییەکانی رووداو، لە هەمان شوێنی تەقینەوەی ئەو هاوەنەدا، هێزەکانی ئاسایشی کۆیە گوللـە هاوەنێکی دیکەیان دۆزیوەتەوە و هەڵیانگرتووەتەوە.