فوئاد حوسێن، وەزیری دەرەوەی عێراق
رووداو دیجیتاڵ
فوئاد حوسێن، وەزیری دەرەوەی عێراق دەڵێت، پێویستە شنگال بە دەست خەڵکەکەیەوە بێت و رێککەوتنی شنگال جێبەجێ بکرێت.
ئەمڕۆ شەممە، 3ـی ئابی 2024، لە وەڵامی پرسیاری پەیامنێری رووداو سەبارەت بە پرسی گەڕاندنەوەی ئاوارەکان بۆ زێدی خۆیان و قەرەبووکردنەوەی زیانلێکەوتووانی شارەکە، د. فوئاد حوسێن گوتی، هەموو هەوڵێکیان بۆ بەجینۆسایدناساندنی کۆمەڵکوژیی کوردانی ئێزدی داوە، بەڵام کاتی زیاتری پێویستە.
وەزیری دەرەوەی عێراق باسی لەوەکرد، کار بۆ ئاوەدانکردنەوەی شنگال و قەرەبووکردنەوەی قوربانییان کراوە، رێکخراوێک دروستکراوە بۆ ئەوەی ئەو شوێن و خانووانەی لە سەردەمی داعش رووخێنراون، ئاوەدان بکرێنەوە.
سەبارەت بە چارەسەری بنەڕەتیی کێشەکانی شنگال، وەزیری دەرەوەی عێراق دەڵێت، "تاکە چارەسەر ئەوەیە رێککەوتننامەی شنگال جێبەجێ بکرێت و حوکمڕانیی شارەکە بەدەست خەڵک خۆیەوە بێت."
گوتیشی، "هۆکاری سەرەکیی نەگەڕانەوەی ئاوارەکانی شنگال بۆ زێدی خۆیان، نەبوونی سەقامگیرییە لە شارەکەدا و پێویستە ئەو کێشەیە چارەسەر بکرێت."
ئەمڕۆ 10 ساڵ بەسەر جینۆسایدی کوردانی ئێزدیدا تێدەپەڕێت کە لە 3ـی ئابی 2014، رێکخراوی داعش هێرشێکی بەرفراوانی کردە سەر شنگال و دەوروبەری. لە هێرشەکەدا 11 هەزار و 417 کوردی ئێزدی رفێندران، کۆمەڵکوژ و بێسەروشوێنکران و دوای هێرشەکەش، ژمارەیەکی زۆریان ئاوارەی هەرێمی کوردستان بوون.
پێنج ساڵ دوای کۆنترۆڵکردنەوەی شارەکە، حکومەتی هەرێمی کوردستان و حکومەتی عێراق لە تشرینی یەکەمی 2020، رێککەوتنێکیان بۆ ئاساییکردنەوەی دۆخی شنگال واژۆکرد.
رێککەوتنەکە دەرکردنی هەموو هێزە چەکدارەکانی حەشدی شەعبی و هێزەکانی نزیک لە پارتی کرێکارانی کوردستان (پەکەکە) لە قەزاکە، لەگەڵ راسپاردنی ئەرکی پاراستنی ئاسایشی شارەکە بە پۆلیس و دەزگای ئاسایشی نیشتمانی و هەواڵگریی فیدراڵی، هەروەها دانانی قایمقامێکی نوێ بۆ شنگال و ئاوەدانکردنەوەی شارەکە و رەخساندنی زەمینە بۆ گەڕانەوەی ئاوارەکان، لەخۆدەگرێت.
بەڵام لەوکاتەوە تاوەکو ئێستا رێککەوتنەکە بەهۆی ناکۆکیی نێوان هەولێر و بەغدا و ملکەچنەبوونی گرووپە چەکدارەکان، جێبەجێ نەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ