پۆلیسی کرماشان تۆمەتباری کوشتنی سێ ئەندامی خێزانێک و کەسێکی نزیکیان دەکوژێت

 

مەهدی حاجیان، فەرماندەی پۆلیسی پارێزگای کرماشان گوتی: بکوژی چوار کەسی یەکێک لە گوندەکانی سەر بە شاری کرماشان، لە شاخەکانی ناوچەی جەلالوەند خۆی حەشار دابوو، پۆلیس دوای مانگێک گەڕان و بەدواداچوون، شوێنەکەی دۆزیەوە و رۆژی چوارشەممە هەوڵیاندا دەستگیری بکەن.

 

بەگوتەی مەهدی حاجیان، پۆلیس چوونەتە شوێنەکە و گەمارۆیان داوە، بەڵام تۆمەتبار خۆی رادەست نەکردووە و تەقەی لە پۆلیس کردووە، بۆیە پۆلیس وەڵامی داوەتەوە و برینداری کردووە. دواتر تۆمەتبارەکە گواستراوەتەوە نەخۆشخانە، سەرەڕای هەوڵی پزیشکەکان، بەڵام گیانی لەدەستداوە.

 

فەرماندەکەی پۆلیس دەڵێ: ئەو بکوژە چەکێکی کڵاشینکۆف، دوو فیشەکدان، 33 فیشەک و دووربینێکی پێ بووە.

 

رۆژی 03-07-2023 لە ناوچەی جەلالوەند، سەر بە شاری کرماشان، لەسەر لەوەڕگە شەڕ لەنێوان دوو خێزاندا روویدا، ئەو کەسەی رۆژی چوارشەممە کوژرا، بە گوتەی پۆلیس تەقەی لە خێزانەکەی دیکە کرد و باوکێک، دوو کوڕی و کەسێکی دیکەی کوشت.

 

ئەو دوو خێزانە ماوەیەکی زۆر بووە ناکۆکییان هەبووە و زۆر جاران خەڵک هەوڵیانداوە ناوبژیوانییان بکەن و ناکۆکییەکەیان چارەسەر بکەن.