گومرگی کرماشان: لە چوار مانگدا بای نزیکەی یەک ملیار دۆلار کاڵا هەناردە کراوە

 

عەلی ئەسغەر عەباسزادە، بەڕێوەبەری گومرگی پارێزگای کرماشان، رایگەیاند، لەماوەی چوار مانگی رابردوودا لە سەرجەم دەروازە سنوورییەکانی ئێران و رۆژهەڵاتی کوردستان بە بەهای 2 ملیار و 371 ملیۆن و 602 هەزار دۆلار کەلوپەل هەناردەی عێراق کراوە. کە 935 ملیۆن و 575 هەزار دۆلاری لە رێگەی دەروازەکانی پارێزگای کرماشانەوە بووە. 

 

بەگوتەی عەلی ئەسغەر عەباسزادە، لەو ماوەیەدا نزیکەی 6 ملیۆن و 402 هەزار تۆن کەلوپەل بۆ عێراق هەناردە کراوە، کە 2 ملیۆن و 400 هەزار تۆنی لە دەروازە سنوورییەکانی پارێزگای کرماشانەوە بووە.

 

بەپێی راپۆرتی گومرگی پارێزگای کرماشان، زۆرتر ئاسن، کاشی، میوە و سەوزە، بەردی بیناسازی، شیرەمەنی و بەرهەمە پلاستیکییەکان هەناردە کراون.

 

پارێزگای کرماشان دوو دەروازەی فەرمیی سنووری و 5 بازاڕچەی هەیە و ساڵانە زیاتر لە 3 ملیار دۆلار کەلوپەل لەم شوێنانەوە هەناردە دەکرێت.