پێشکێشکردنی لیستی بەربژێرانی هەڵبژاردنی پەرلەمانی کوردستان دەستپێدەکات

 

 

جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق رۆژی چوارشەممە 03-07-2024 بە تۆڕی میدیایی رووداوی راگەیاند، کۆمیسیۆن لە رۆژی پێنجشەممە 04-07-2024 تاوەکو رۆژی 15-07-2024 دەرگای پێشکێشکردنی بەربژێرانی هاوپەیمانی، پارت، بەربژێری تاک و پێکهاتەکان بۆ بەشداری لە هەڵبژاردنی پەرلەمانی کوردستان دەکاتەوە.

 

گوتەبێژی کۆمیسیۆن گوتیشی، سبەی پێنجشەممە 4ی تەممووز ماوەی تۆمارکردنی پارت و هاوپەیمانییەکان کۆتایی دێت و راستەوخۆ پێشکێشکردن و وەرگرتنی لیستی بەربژێرەکان دەستپێدەکات.

 

عیماد جەمیل، سەرۆکی تیمی رۆژنامەڤانیی کۆمیسیۆنی باڵای سەربەخۆی هەڵبژاردنەکانی عێراق، رۆژی 03-07-2024 بە تۆڕی میدیایی رووداوی راگەیاند، "پێشکێشکردنی لیستی بەربژێرەکان لە ئۆفیسەکانی کۆمیسیۆن دەبێت لە هەرێمی کوردستان."

 

رۆژی چوارشەممە 26-06-2024 دڵشاد شەهاب، گوتەبێژی سەرۆکایەتیی هەرێمی کوردستان رایگەیاند، نێچیرڤان بارزانی 20ی تشرینی یەکەمی ئەم ساڵی بۆ بەڕێوەچوونی هەڵبژاردنی پەرلەمانی کوردستان دیاریکرد.