پەروین بوڵدان و میتحەت سانجار بە هاوسەرۆکی هەدەپە هەڵبژێردرانەوە

 

لە کۆنگرەکەدا پەروین بوڵدان، هاوسەرۆکی گشتیی هەدەپە گوتارێکی پێشکێشکرد و لەبارەی چارەسەرکردنی پرسی کورد گوتی، "پەرلەمان شوێنی چارەسەرکردنی کێشەی کوردە. جەخت لەسەر خەباتی هاوبەش دەکەینەوە لە دژی ئاکەپە کە رۆژ لە دوای رۆژ وڵات زیاتر بەرەو دواوە دەبات. سەردەمی ئەو سیاسەتە کۆتاییهات کە کێشەکان چارەسەرناکات، ئیدی سەردەمی هەدەپە دەستپێدەکات." 

 

پارتی دیموکراتی گەلان - هەدەپە - کە لە ساڵی 2012ـدا دامەزراوە، سێیەم گەورەترین فراکسیۆنە لە پەرلەمانی تورکیا. زۆرترین دەنگدەری هەدەپە کوردن، بەڵام خۆی وەک پارتێکی تورکیایی پێناسە دەکات. 

 

هاوکات، میتحەت سانجار، هاوسەرۆکی گشتیی هەدەپە گوتارێکی پێشکێشکرد و چەند پەیامێکی بە لایەنە جیاوازەکان دا. سانجار لە بابەتی هەڵبژاردنی بەربژێر بۆ هەڵبژاردنی سەرۆککۆماری تورکیا کە بڕیارە حوزەیرانی 2023 بەڕێوەبچێت، گوتی، "ئێمە لە بیرۆکەی دەستنیشانکردنی بەربژێرێکی هاوبەش بۆ پۆستی سەرۆککۆماردا کراوەین، بەجۆرێک دیدارەکان بە شێوەیەکی روون و بە ئاگاداریی خەڵک بەڕێوەبچن. ئەگەر ئەم بانگەوازەمان بێوەڵام بمێنێتەوە، ئاساییترین مافی خۆمان بەکاردەهێنین کە بەشداریکردنمانە بە بەربژێری خۆمان. ئامانجمان ئەوەیە لانیکەم بەربژێرەکەمان بچێتە خولی دووەمی هەڵبژاردنەکە."  

 

لەم کۆنگرەیەی هەدەپەدا دروشمەکانی وەکو، "سیستمی هاوسەرۆکایەتی هێڵی مۆرە بۆ ئێمە، واز لە پەیماننامەی ئیستەنبووڵ ناهێنین، چارەسەری دیموکراسیانە بۆ پرسی کورد، نا بۆ رژێمی تاکڕەوی و بەڵێ بۆ کۆمارێکی دیموکراسی، نا بۆ شەڕ و پەراوێزخستن و بەڵێ بۆ ئاشتی و چارەسەر" گوترانەوە.