رووداو دیجیتاڵ
بۆ رێگریکردن لە هەر جۆرە کاردانەوەیەکی بڕیاری دەستبەسەرکردنی سەرۆکی شارەوانیی جۆلەمێرگ، قەدەخەی هەموو جۆرە چالاکییەکی وەک خۆپیشاندان، رێپێوان، لێدوانی رۆژنامەڤانی، گردبوونه‌وه و خێوه‌ت هه‌ڵدان لە جۆلەمێرگ بۆ ماوەی 10 رۆژ راگەیێندرا.
شەوی رابردوو، هێزە ئەمنییەکانی تورکیا محەممەد سدیق ئاکش، سەرۆکی شارەوانیی جۆلەمێرگیان لە پارێزگای وان دەستبەسەرکرد و بەیانی ئەمڕۆش دووشەممە پۆلیسی جۆلەمێرگ هەڵیانکوتایە سەر باڵەخانەی شارەوانیی شارەکە و پشکنینیان کرد. بەو هۆیەوە خەڵک لەبەردەم بالەخانەی شارەوانیی جۆلەمێرگ گردبوونەوە.
بۆ رێگرتن لە هەر جۆرە کاردانەوەیەک، پارێزگاری جۆلەمێرگ لە راگەیێندراوێکدا قەدەخەی هەموو جۆرە چالاکییەکی وەک خۆپیشاندان، رێپێوان، لێدوانی رۆژنامەڤانی، گردبوونه‌وه و خێوه‌ت هه‌ڵدان بۆ ماوەی 10 رۆژ راگەیاند.
لە راگەیێندراوەکاندا هاتووە "لەپێناو یەکڕیزیی گەل، یەکپارچەیی وڵات، پاراستنی ئاسایشی نیشتمانی، رێگریکردن لە تاوان، پاراستنی تەندروستیی گشتی و رێگریکردن لە تووندوتیژی، بە پشتبەستن بە بڕگەکانی ئەلیف و جیم لە 11ـیەمین ماددەی یاسای ژمارە 5442ـی بەڕێوەبردنی شارەکان و 17ـیەمین ماددەی یاسای ژمارە 2911ـی چالاکییەکان، کۆمەڵێک رێوشوێن گیراونەتەبەر."
لە راگەیێندراوەکەدا باس لەوە کراوە، لە کاژێر 00:00ـی رۆژی 3ـی حوزەیران تاوەکو کاژێر 23:59ی رۆژی 13ـی حوزەیرانی 2024 بۆ ماوەی 10 رۆژ بەدەر لەو چالاکییانەی لەلایەن پارێزگا و قایمقامییەتەکانەوە مۆڵەتیان پێدەدرێت، هەموو جۆرە گردبوونەوەیەک و چالاکییەک قەدەخەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ