رووداو دیجیتاڵ
بەڕێوەبەری گشتیی دانەوێڵەی پارێزگای ئیلام رایگەیاند، لە باشووری پارێزگاکە وەرزی دروێنەی گەنم دەستیپێکردووە، بەپێی خەمڵاندنەکانیان تاوەکو کۆتایی وەرزی دروێنەی ئەمساڵ بەرهەمی گەنم ژمارەیەکی پێوانەیی تۆمار دەکات و دەگاتە 400 هەزار تۆن.
ئەسغەر باباخانی، بەڕێوەبەری گشتیی دانەوێڵەی پارێزگای ئیلام ئەمڕۆ هەینی رایگەیاند: "ئێستا 17 سایلۆ لە کەرتی تایبەت بە توانای 430 هەزار تۆن و 23 ناوەندی هەرەوەزی گوندنشین ئامادەن بۆ کڕین و هەڵگرتنی سەرجەم بەرهەمە گەنمی جووتیارانی هەموو شارەکانی پارێزگاکە."
ئەسغەر باباخانی گوتی، دروێنەی گەنم باشووری پارێزگاکە و بە تایبەت لە شارەکانی مێهران، دێلوران و ئابدانان دەستیپێکردووە و تائێستا 100 هەزار تۆن گەنم بەرهەم هاتووە، کە بەراورد بە هەمان ماوەی ساڵی رابردوو، 4 هێندە زیادیکردووە.
باباخانی پێشبینی دەکات تاوەک کۆتایی وەرزی دروێنە، بەرهەمی گەنم لە پارێزگای ئیلام بگاتە 400 هەزار تۆن و لەو بڕەش 350 هەزار تۆن لە لایەن حکومەتەوە وەردەگیرێت.
دەشڵێت، بۆ ئەمساڵ حکومەت یەک کیلۆ گەنمی ئاسایی بە 17 هەزار و 500 تمەن و یەک کیلۆ گەنمی پلە یەکیش بە 18 هەزار تمەن لە جووتیاران دەکڕێت.
بەڕێوەبەری گشتیی دانەوێڵەی پارێزگای ئیلام ئاماژە بە کوالێتی بەرزی گەنمی ئەو پارێزگایە دەکات و دەڵێت، لە رووی کوالێتی گەنمەوە ئیلام یەکێک لە چوار پارێزگای پێشەنگە لە ئێران.
ئەمساڵ لە پارێزگای ئیلام لە رووبەری زیاتر لە 150 هەزار هێکتار گەنم چێنراوە کە 58 هەزار هێکتار زەویی بەرئاو و زیاتر لە 92 هەزار هێکتار زەویی دێمە.
ساڵی پار لەو پارێزگایە لە رووبەری زیاتر لە 134 هەزار هێکتار گەنم چێنرابوو کە 57 هەزار هێکتار زەویی بەرئاو و زیاتر لە 77 هەزار هێکتار زەویی دێمی بوو و بۆ یەکەمجار بەرهەمهێنانی گەنم لەو پارێزگایە گەیشتە 390 هەزار تۆن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ