کوردستان
زیاتر لە سێ هەزار نابیست لە وەزارەتی کار و کاروباری کۆمەڵایەتی تۆمارکراون کە مووچە وەردەگرن
prev
next
رووداو دیجیتاڵ
ئەمڕۆ رۆژی جیهانیی بیستنە. هەزاران کەس لە عێراق و هەرێمی کوردستان هەن، کە لەو هەستە بێبەشن.
موەفەق خەفاجی، سەرۆکی کۆمەڵەی کەمئەندامانی عێراق بە تۆڕی میدیایی رووداوی راگەیاند، "لە عێراق و هەرێمی کوردستان نزیکەی 400 هەزار نابیست هەن، کە تەنیا 20%ـیان مووچەی چاودێریی کۆمەڵایەتی وەردەگرن."
موەفەق خەفاجی دەڵێت، "بۆ وەرگرتنی ئەو مووچەیە، پێوەر و مەرج دانراون، کە یەکێک لەوانە هەژارییە. مووچەکەش لە 125 هەزار دینارەوە دەستپێدەکات، ئەگەر کەسی نابیست ژیانی هاوژینیی پێکهێنابێت و منداڵی هەبێت، مووچەکەی بۆ 270 هەزار دینار بەرزدەکرێتەوە."
هەر ئەمڕۆ (دووشەممە، 3ـی ئایاری 2025) ئاریان ئەحمەد، گوتەبێژی وەزارەتی کار و کاروباری کۆمەڵایەتیی هەرێمی کوردستان بە رووداوی راگەیاند، "ژمارەی ئەو نابیستانەی لە وەزارەتەکەماندا تۆمارکراون و مووچە وەردەگرن، 3 هەزار و 257 کەسە، کە هەزار و 609ـیان نێر و هەزار و 648ـیشیان مێن."
ئاریان ئەحمەد گوتیشی، "بەدڵنیاییەوە ژمارەی نابیستان لە هەرێمی کوردستان زۆر لەوە زیاترە کە مووچە وەردەگرن، بەڵام تۆمارنەکراون و بەدیاریکراوی ژمارەیان نازانین."
نابیستان تا چ قۆناخێک دەتوانن بخوێنن؟
موەفەق خەفاجی، سەرۆکی کۆمەڵەی کەمئەندامانی عێراق دەڵێت، "لە عێراق، کەسانی نابیست لە پەیمانگەی تایبەتدا، دەتوانن تاوەکو پۆلی 6ـی سەرەتایی بخوێنن و لە دوای ئەوە، مافی خوێندنیان نابێت و ناتوانن هیچ قۆناخێکی دیکە بخوێنن."
شیلان شێرزاد، وەرگێڕی كۆمەڵەی نابیستانی سلێمانی بە رووداوی گوت، "لە دهۆک، هەولێر، سلێمانی و گەرمیان، چوار پەیمانگەی هیوای نابیستان هەن، کە تایبەتن بە کەسانی نابیست و مامۆستای تایبەت وانەیان تێدا دەڵێنەوە."
بە گوتەی شیلان شێرزاد، "نابیستانی سلێمانی، هەولێر و دهۆک دەتوانن تاوەکو قۆناخی 9ـی ناوەندی بخوێنن، لەدوای ئەوە دەتوانن لە سلێمانی لە پەیمانگە تایبەتەکانی کۆمپیوتەر بخوێنن و بڕوانامە بەدەستبهێنن. بەڵام لە گەرمیان خوێندنی نابیستان تاوەکو پۆلی 4ـی سەرەتاییە."
لە ساڵی 2007، رێکخراوی نەتەوە یەکگرتووەکان، رۆژی 3ـی ئاداری هەموو ساڵێکی وەکو رۆژی جیهانیی 'بیستن' دیاریکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ