کۆمیسیۆنی عێراق: زیاتر لە 28 ملیۆن کەس مافی دەنگدانیان لە هەڵبژاردنی داهاتوو دەبێت

 

 

جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق، دووشەممە 03-02-2025 بە تۆڕی میدیایی رووداوی راگەیاند، کۆی گشتیی ژمارەی دەنگدەران لە عێراق 28 ملیۆن و 79هەزار و 889 کەسە. 

 

گوتەبێژی کۆمیسیۆن گوتی، ئەوانەی بایۆمەتریان کردووە 19 ملیۆن و 798 هەزار و 790 کەسن، بەڵام هێشتا هەشت ملیۆن و 281 هەزار و 99 کەس  بایۆمەتریان نەکردووە.

 

بەگوتەی جومانە غەلای، تاوەکو (30-01-2025)، 19 ملیۆن و 52 هەزار و 963 کارتی دەنگدان دابەشکراون.

 

بەرزترین رێژەی ئەوانەی بایۆمەتریان کردووە لە پارێزگای دیالەیە، کە 81٪ و کەمترینیان 61٪یە لە ئۆفیسی بەغدا - رەسافە. 

 

رێژەی دابەشکردن 94٪یە، زۆرترین دابەشکردنی کارتی بایۆمەتر لە پارێزگاکانی دیالە، میسان و نەینەوان، کە 98٪یە. 

 

بەگوێرەی ئامارەکە، دابەشکردنی کارتی بایۆمەتر لە هەولێر 92٪، دهۆک 90٪، سلێمانی 94٪، کەرکووک 95٪ و نەینەوا98٪یە. 

 

ئەوانەی بایۆمەتریان کردووە لە هەولێر 75٪، دهۆک 80٪، سلێمانی 77٪ ، کەرکووک 75٪ نەینەوا 68٪ و دیالە 81٪ن.