رووداو دیجیتاڵ
پارێزگای کەرکووک رایگەیاند "بەپشتبەستن بە راپۆرتی کەشوهەوا" سبەی لە سەرتاسەری پارێزگای کەرکووک، لە ناوەندەکانی خوێندن پشووی فەرمییە.
لە راگەیێندراوێکدا ئەمشەو (شەممە، 2-11-2024) پارێزگای کەرکووک رایگەیاند "رێبوار تەها، پارێزگاری کەرکووک فەرمانی به بەڕێوەبەرایەتی گشتی پەروەردەی کەرکووک کرد سبەی یەکشەممە، دەوامی فەرمی لە سەرجەم قوتابخانە بنەڕەتی، ناوەندی و دواناوەندییەکانی کەرکووک لە سەرتاسەری کەرکووک رابگرێت، جگە لە خوێندکارانی تاقیکردنەوەکانی خولی سێیەم."
لە راگەیێندراوەکەدا هەروەها هاتووە "پارێزگار فەرمانیشی كرد بە راگرتنی دەوامی فەرمی لە زانکۆ و پەیمانگە حکومیی و ئەهلییەکان، لەپێناو سەلامەتیی قوتابیان و خوێندکارانی خۆشەویستمان."
لە دوێنێوە شەپۆلێکی بارانبارین هەرێمی کوردستانی گرتووەتەوە و بەگوێرەی کەشناسیی هەرێمی کوردستان، درەنگی شەوی شەممە تاوەکو کۆتایی رۆژی یەکشەممە چەقی شەپۆلەکە دەبێت و ناوبەناو لێزمەباران دەبێت.
بەپێی ئامارێکی کەشناسی هەرێمی کوردستان، لە کاژێر 11:00ـی پێشنیوەڕۆ تاوەکو 9:00ـی ئەمشەو لە كەركووک 18.2 ملیم باران باریوە.
ئەمە لەکاتێکدایە لافاو زیانی گیانی و مادی هەبوو لە سنووری کەرکووک، ئەمڕۆ لە ناحیەی عەباسیی پارێزگاکە لافاو ژنێکی برد و بەهۆیەوە گیانی لەدەستدا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ