مەسرور بارزانی: لەماوەیەکی زۆر نزیکدا پشت بەخودا کارەبای 24 کاژێری بۆ هەموو کوردستان دابین دەکەین

 

رۆژی چوارشەممە، 02ی تشرینی یەکەمی 2024، مەسرور بارزانی، جێگری سەرۆکی پارتی دیموکراتی کوردستان لە میانی کۆبوونەوەی لەگەڵ قوتابییان، لاوان و ئافرەتان لە شاری هەولێر، لە گوتارێکدا باسی لە هەڵمەتە هێمن و ئارامەکەی حیزبەکەی کرد و دەڵێ: "دژی تووندوتیژی و تۆقاندنبووین و نەمانویستووە رۆژێک لە رۆژان شەڕ بکەین، ئەگەر لەپێناو بەرگریکردن لەمیللەتەکەمان نەبێت، ئێمە هیچ کات لەگەڵ شەڕ نەبووین و هەمیشە لەگەڵ ئاشتیداین." 

 

جێگری سەرۆکی پارتی باسی لە هۆکارەکانی سەرکەوتنی پارتی لە هەڵبژاردنەکانی هەرێمی کوردستان کرد و گوتی: "پارتی ئەم ئەزموونەی دروستکردووە و پارتیش ئەم ئەزموونە دەپارێزێت. پارتی خاوەنی ئەم ئەزموونەیە. خوا یار بێت لەم هەڵبژاردنە گەورەترین سەركەوتن بەدەست دەهێنین. پارتی بە تەنیا زۆر دەستكەوتی هەبووە، بەڵام هیچ لایەنێكی دیکە بە تەنیا و بەبێ پارتی نەیتوانیوە دەستكەوتی هەبێت."

 

لەدرێژەی قسەکانیدا، مەسرور بارزانی راشیگەیاند: "پارتی دەستی باڵای هەبووە لە ئاوەدانکردنەوەی کوردستان و لە کابینەکانی یەک لە دوا یەکی کە بە سەرپەرشتیی پارتی بووە، دەبینین کوردستان لە چی قۆناخێکەوە بەرەو چی قۆناخێک چووە و چی جۆرە ئاوەدانییەک لە کوردستان هاتووەتە ئاراوە. لە داهاتووشدا پارتی، بەردەوام دەبێت لە زیاتر ئاوەدانکردنی کوردستان."

 

دواتر مەسرور بارزانی، بەڵێنی باشترکردنی خزمەتگوزارییەکان دەدات و رایگەیاند: "لە رووی ئاوەدانییەوە، ئەگەر تەماشا بکەن، لە هەموو شار و شارۆچکەکانی کوردستان، بەبێ هیچ جیاوازییەک پارتی پشکی شێری هەبووە لە ئاوەدانکردنەوەی کوردستان، دەزانم کەموکورتی زۆرە و زۆر شت ماوە بکرێن، لە هەوڵی جیدیداین بۆ ئەوەی پێداوستییەکان باشتر بکرێت و خزمەتگوزارییەکان باشتر بکرێن، ئەجێندایەکی تێروتەسەلمان هەبووە و بەردەوامیش دەبین لەوەی هەموو ئەو کارە خزمەتگوزارییانەی لای ئێوە گرنگن، ئێمە جێبەجێیان بکەین. یەکێک لەوانە کارەبایە کە دەزانم لای هەمووتان گرنگە، بەڵام بەو بەرنامەیەی دەستمان پێکردووە و بەردەوام دەبین لەماوەیەکی زۆر نزیکدا پشت بە خودا کارەبای 24 کاژێریی بۆ هەموو کوردستان دابین دەکەین." 

 

بانگەشەی هەڵبژارنەکانی هەرێمی کوردستان لە 25ی ئەیلوولی رابردوو دەستیپێکرد و بڕیاریشە بانگەشە تاوەکو 15ی ئەم مانگە بەردەوام بێت، پێنج رۆژ پێش بەڕێوەچوونی هەڵبژاردنی پەرلەمانی کوردستان لە 20ی تشرینی یەکەم، کە تیێیدا سێ ملیۆن و 789 هەزار کەس لە چوار بازنەی هەرێمی کوردستان مافی دەنگدانیان هەیە.