لە سنووری کەرکووک هێرشکرایە سەر هێزێکی سوپای عێراق و چوار سەرباز گیانیان لەدەستدا

 

هێرشەکە لە سنووری گوندی زغێتونی سەر بە ناحیەی رەشادی باشووری کەرکووک روویداوە، هێزێکی سوپای عێراق کراونەتە ئامانج و بەهۆیەوە چوار سەرباز کوژراون.

 

وەزارەتی ناوخۆی عێراق دەڵێت، هێزێکی هەواڵگریی لیوای 47، فیرقەی 11 بەمەبەستی جێبەجێکردنی ئەرکێک بۆ کێوماڵکردنی مۆڵگەکانی چەکدارانی داعش دەرچوون. هێزەکە رووبەڕووی کەمینێکی چەکدارانی داعش بوونەتەوە و تەقەیان لێکراوە. بەهۆیەوە چوار کەس گیانیان لەدەستداوە و سێ کەسی دیکەیش بریندارن.

 

وەزارەتی ناوخۆی عێراق روونیکردووەتەوە، دوای هێرشەکە، هێزەکانیان گەمارۆی گرووپەکەی چەکدارانی داعشیان داوە و رووبەڕوویان بوونەتەوە.