رووداو دیجیتاڵ
وەزارەتی بەرگریی تورکیا لە نوێترین راگەیێندراویدا لە هەژماری تۆڕی ئێکس، بۆردوومانکردنی 20 پێگەی پارتی کرێکارانی کوردستان- پەکەکە لە هەرێمی کوردستان راگەیاند.
بە گوێرەی راگەیێندراوەکەی وەزارەتی بەرگریی تورکیا، فڕۆکە جەنگییەکانی سەر بە فەرماندەیی هێزەکانی ئاسمانی و بە هاوئاهەنگی میت، رۆژی 2ـی ئەیلوولی 2024، بۆردوومانکردنی 20 پێگەی پەکەکە لە خاکی هەرێمی کوردستان بڵاوکردەوە.
لە راگەیێندراوەکەدا باس لەوەشکراوە کە، "بە مەبەستی لەنێوبردنی ئەندامانی رێکخراوی تیرۆریستی جوداخوازی پەکەکە/کەجەکە، تێکشکاندنی ئەو هێرش و هەڕەشانەی لە باکووری عێراقەوە دەکرێنە سەر هێزە ئەمنییەکان و خەڵکی سڤیلمان و بۆ پاراستنی سنوورەکانمان؛ ئۆپەراسیۆنە ئاسمانییەکان لە ناوچەکانی مەتین، زاپ، گارە، خواکوڕک، قەندیل و ئاسۆس ئەنجامدرا."
جەخت لەوەشکراوەتەوە کە لە ئۆپەراسیۆنەکەدا 20 پێگەی پەکەکە، لە حەشارگە، ئەشکەوت، کۆگە و پەناگە کرایە ئامانج.
باس لەوەش دەکات، زۆرینەی چەک و تەقەمەنی و تەکنەلۆژیا سەربازییە بەکارهاتووەکان لەم بۆردوومانە ئاسمانییەدا، دروستکراوی تورکیان.
رۆژی 31-8-2024، ناوەندی چاپەمەنی و راگەیاندنی هێزەکانی پاراستنی گەل (هەپەگە) کە باڵی سەربازیی پەکەکەیە، لە راگەیێندراوێکدا بڵاویکردەوە، چوار جار هێرشیان کردووەتە سەر هێزەکانی تورکیا و بەهۆیەوە دوو سەرباز کوژران و سەربازێکی دیکەش برینداربووە.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ