رەئووف سەعدوڵڵا
رووداو دیجیتاڵ
بەرپرسی یەکەی سەرپەرشتیاری خوێندنی کوردی لە کەرکووک دەڵێت، حەوت هەزار و 354 مامۆستای خوێندنی کوردی لە شارەکە هەن. مافیان لە داهاتی کەرکووک دا هەیە، مووچەکەیان دەبێ لەسەر عێراق بێت نەک هەرێمی کوردستان.
رۆژی دووشەممە 02-09-2024، رەئووف سەعدوڵڵا، لەکاتی بەشداریکردنی لە بووڵتەنی کاژێر 14:00ـی تۆڕی میدیایی رووداو کە ئارێز خالید پێشکێشێکرد رایگەیاند، مافی مامۆستایانی خوێندنی کوردی [مووچە] لە کەرکووکە نەک لە هەرێمی کوردستان، چونکە حکومەتی عێراق پارەی نەوت و داهاتەکانی دیکەی کەرکووک دەبات.''
جگە لەو مووچەخۆرانەی سەر بە هەرێمی کوردستانن، مووچەخۆرانی ئەو ناوچانە لەگەڵ ناوچەکانی دیکەی عێراق دا مووچە وەردەگرن، مووچەی مانگەکانی حەوت و هەشتیشیان وەرگرتووە. رەئووف سەعدوڵڵا گوتی، ''مافێکی رەوای خۆمانە وەکو خوێندنی عەرەبی و تورکمانی، شایستە داراییەکانی ئێمەش لە حکومەتی عێراق خەرج بکرێت.''
بەرپرسی یەکەی سەرپەرشتیاری خوێندنی کوردی لە کەرکووک ئەوەشی خستەڕوو، دوای پڕۆسەی رزگارکردنی عێراق، خوێندنی کوردی لە کەرکووک، لە رووی مووچە و دابینکردنی کتێبەوە لەلایەن عێراق پشتگوێ خراوە. ''دەبووایە حکومەتی عێراقی وەکو خوێندنی عەرەبی و تورکمانی، مووچەی مامۆستایان و کتێبی خوێندنی کوردی دابین کردبایە.''
بە گوتەی رەئووف سەعدوڵڵا، بەهۆی دواکەوتنی مووچەکەیانەوە، مامۆستایانی خوێندنی کوردی لە کەرکووک لە دۆخێکی دارایی خراپدان و داوای ئەوە دەکەن هاوشێوەی مامۆستایانی دیکە، مووچەکانیان بخرێتە سەر بەغدا.
ئەو بەڕێوەبەرەی خوێندنگە کوردییەکان لە کەرکووک ئەوەشی خستەڕوو، حەوت هەزار و 354 مامۆستای خوێندنی کوردی لە شارەکە هەن کە لە رووی وانەگوتنەوە مامۆستای نموونەیین و ''سەرەڕای دواکەوتن و پاشەکەوتی مووچە، ساڵانە بە باشترین شێوە ئەرکی خۆیان جێبەجێ کردووە.''
خوێندنی کوردی لە ناوچەکانی دەرەوەی ئیدارەی هەرێمی کوردستان، جگە لە شایستە داراییەکانی مووچەخۆرانیان، پڕۆگرامی خوێندن، کاتی دەستپێکردنی دەوام و کۆتاییهاتنیشی لەگەڵ هەرێمی کوردستان دایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ