کوردستان
دیمەنێکی شەوی 2-9-2023ـی شەقامێکی کەرکووک کە خۆپێشاندەران لەسەر ئاگریان کردووەتەوە و رێگەیان گرتووە
رووداو دیجیتاڵ
چوارچێوەی هاوئاهەنگی لە پەیامێکدا داوا لە لایەنە سیاسییەکان دەکات لەبارەی کەرکووک خۆیان لە "گوتاری تووند" بەدووربگرن.
لە راگەیێندراوێکدا کە درەنگانی رۆژی شەممە (2-9-2023) بڵاویکردەوە، چوارچێوەی هاوئاهەنگی دەڵێت، "بەوپەڕی گرنگییەوە چاودێریی پێشهاتەکانی رووداوەکانی پارێزگەی کەرکووک، خۆپێشاندان و ناڕەزایی و تووندوتیژییەکانی دەکەین کە بووە هۆی کوژران و برینداربوونی ژمارەیەک هاووڵاتی و سووتان و وێرانبوونی سامانی تایبەت."
ئەو هاوپەیمانێتییە کە بەشی زۆری پارتە شیعەکانی عێراقی تێدایە، دەڵێت "جەخت دەکەینەوە کە تووندوتیژی و گرژبوونی دۆخەکە، نابێتە چارەسەر لەنێوان لایەن و پێکهاتەکانی شارەکەدا؛ هەروەها پشتیوانیی خۆمان بۆ هەموو رێوشوێنێکی حکومی دەردەبڕین کە فەرماندەی گشتیی هێزە چەکدارەکان بڕیاری لەسەر داوە بۆ کۆنترۆڵکردنی دۆخی ئەمنی و پاراستنی سەقامگیریی پارێزگاکە."
چوارچێوەی هاوئاهەنگی هەروەها داوا لە هەموو هێزە سیاسییەکان دەکات "خۆیان لە گوتاری تووند بەدووربگرن و کار لەسەر هێورکردنەوەی دۆخەکە بکەن و پشتیوانی لە دەزگا ئەمنییەکان بکەن بۆ ئەوەی بە ئەرکی خۆیان هەستن لە پێناو پاراستنی سامانی گشتی و تایبەت،" دەشڵێت، "جەخت دەکەینەوە کە سەقامگیریی کەرکووک، بەرپرسیارییەتی هەمووانە."
راگەیێندراوەکە لە کاتێکدایە، رۆژی شەممە کاژێر 17:00 هاونیشتمانیان لە کەرکووک دەستیان بە خۆپێشاندان کرد، ئەوەش وەک ناڕەزایی دەربڕین لە بەرامبەر داخستنی رێگەی سەرەکیی نێوان کەرکووک - هەولێر لە لایەن بەشێک لە عەرەب و تورکمانەوە کە دژی ئەوەن بارەگاکانی پارتی لە شارەکە رادەستی ئەو حیزبە کوردستانییە بکرێنەوە.
دواتر خۆپێشاندانەکە گرژی لێکەوتەوە و تەقە لە خۆپێشاندەران کرا.
رۆژی یەکشەممە 03-09-2023، عامر شوانی، گوتەبێژی پۆلیسی کەرکووک بە تۆڕی میدیایی رووداوی گوت، "ژمارەی شەهیدەکان لە خۆپیشاندانەکە گەیشتووەتە سێ کەس بە ناوەکانی هاوکار عەبدوڵڵا، هەڤاڵ ستار سەعید کە پێشمەرگەن و سەمەد محەممەد رەمەزان کە خەڵکی سڤیلە و لەدایکبووی 2002ـە. هەر سێکیان بە فیشەک لە رەحیماوا شەهیدکراون."
لەبارەی ئاماری بریندارەکانیش عامر شوانی گوتی، تاوەکو ئێستا برینداربوونی 9 کەس پشتڕاستکراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ