یەکێک لەو خانووە رووخاوانەی وێنەی قوربانییانی پێدا هەڵواسراوە.
رووداو دیجیتاڵ
10 ساڵ بەسەر داگیرکردنى شنگال لەلایەن داعش تێپەڕی، هێشتا زۆرینەى خانووەکان خاپوورن و برینى قوربانیانیش ساڕێژ نەبووە.
وێنەى ئەوانەى بەدەستى داعش کوژران و یان بێسەروشوێنن، بە دیواری ئەو خانوو و باڵەخانەدا هەڵواسراون، کە هێشتا وێرانەن.
مەیسەر خەڵەف، کوردى ئێزدىی شنگالە و دەڵێت: "ئەو کاتەى لە 3ىئابى 2014 داعش هات ژمارەیەکى زۆر کوردى ئێزدیی لێرە کوشت، ئێمە وەک کەسوکارى قوربانیان بووەتە ئەرکمان کە ئەم هەڵوەستەیە بکەین، بۆ هەموو کوردانى ئێزدی بەبێ جیاوازى".
داعش لە کاتی پەلاماردانی شنگال، زیاتر لە شەش هەزار کوردی ئێزدی رفاند، تائێستاش چارەنووسی 2600 رفێندراو دیار نییە.
بەگوێرەى رێکخراوى نەتەوە یەکگرتووەکان، بەهۆى ئەو هێرشەوە 80٪ـی ژێرخانى شنگال خاپوور و 70٪ـی خانووەکانى رووخاون.
مەحما خەلیل، ئەندامى پەرلەمانى عێراق لە پشکى شنگال دەڵێت: "هێشتا دۆخى شنگال خراپە، ئەوەى پێشتر رووویدا کۆمەڵکوژى بوو، ئەوەى ئێستا روودەدات کۆمەڵکوژى سیاسیى، جوگرافی، خزمەتگوزاریی و ئابوورییە، کۆمەڵکوژى مافە، حکومەتى فیدراڵى چەندین بڕیار و رێککەوتنى لەبارەى شنگال دەرکردووە، بەڵام هەر مەرەکەبى سەر کاخەز بوون لەوانە رێککەوتنى شنگال"
ساڵى 2020 هەولێر و بەغدا رێککەوتننامەى شنگال-یان واژۆ کرد، یەکێک لە خاڵەکانى ئاوەدانکردنەوەى قەزاکە بوو.
ئەم ساڵ بۆ یەکەمجار بە بڕیارى حکومەتى فیدراڵى رۆژی سێی ئاب، وەک رۆژى رێزگرتن لە قوربانییانى کوردانى ئێزدى دەستنیشانکرا و یادی قوربانییان دەکرێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ