دوو هاونیشتمانی لە سنووری هەولێر لە ئاودا خنکان

 

 

ئەمڕۆ هەینی 2ی ئابی 2024 موقەدەم زانا نامیق، ئەفسەری بنکەی بەرگریی شارستانیی خەبات لە سنووری پارێزگای هەولێر بە تۆڕی میدیایی رووداوی راگەیاند، "هاونیشتمانییەک بەلەمەکەی بە خێراییەکی زۆر بەنێو زێی گەورەدا سووڕاندووەتەوە و لە مێرمنداڵێکی داوە. مێرمنداڵەکە ژێرئاو کەوتووە و خنکاوە."

 

موقەدەم زانا نامیق گوتیشی، "مێرمنداڵەکە تەمەنی 15 ساڵە و تیمەکانی بەرگریی شارستانی سەرقاڵی گەڕانن بەدوای تەرمەکەیدا، بەڵام تاوەکو ئێستا نەدۆزراوەتەوە."

 

هەر ئەمڕۆ عەقید عەبدولقادر دڵشاد، بەڕێوەبەری بەرگریی شارستانی شەقڵاوە بە رووداوی گوت، "کاژێر 04:45 خولەکی دوای نیوەڕۆی ئەمڕۆ هەینی، دوای ئەوەی لەلایەن دانیشتوانی گوندی تاڵەجاڕی سەر بە هەریر لە خنکان ئاگادارکراینەوە، تیمەکانی بەرگریی شارستانی گەیشتنە شوێنی رووداوەکە و بە هاوکاری مەلەوانان توانرا تەرمی مێرمنداڵێک بەناوی محەممەد بەختیار رەزاق، تەمەن 16 ساڵ لە چەمی شێخ توراب دەربهێننەوە."

 

ساڵانە لە وەرزی هاویندا هاونیشتمانیان و گەشتیاران سەردانی چەم و رووبارەکان دەکەن و بەوهۆیەوە خنکان بەراورد بە وەرزەکانی دیکە زیاتر دەبێت.