خوێندنی کوردی لە کەرکووک لەبارەی گواستنەوەی راژەکانیان بۆ سەر بەغدا: چاوەڕوانی پەسندکردنی بودجەین

 

زیاتر لە 13 هەزار مامۆستای کوردی لە ناوچە کوردستانییەکانی دەرەوەی ئیدارەی هەرێمی کوردستان راژەیان لەسەر وەزارەتی پەروەردەی حکومەتی هەرێمی کوردستانە و داوا دەکەن بگوازرێنەوە سەر وەزارەتی پەروەردەی عێراق، تەنیا لە سنووری پەروەردەی خانەقین 3 هەزار و 600 مامۆستا وانە دەڵێنەوە و مووچەیان لەسەر هەرێمی کورستانە. 

 

لەبارەی هەوڵەکان بۆ گواستنەوەی راژەی مامۆستایانی کوردی بۆسەر وەزارەتی پەروەردەی عێراق، شێرزاد رەشید، بەڕێوەبەری خوێندنی کوردی لە کەرکووک بە تۆڕی میدیایی رووداوی راگەیاند: "لە چوارچێوەی شاندێکی وەزاری بە سەرپەرشتی وەزیری پەروەردەی هەرێمی کوردستان سەردانی بەغدامان کرد و بەرنامەیەکی چڕوپرمان پێشکێشی وەزارەتی پەروەردەی عێراق کرد بۆ گواستنەوەی راژەی خوێندنی کوردی لە کەرکووک و خانەقین و ناوچەکانی دیکە." 

 

خوێندنی کوردیی لە دوای ساڵی 2003ـەوە لە کەرکووک دەستیپێکردووە، 88 هەزار قوتابی لە 550 قوتابخانە و باخچەی ساوایاندا لەژێر سەرپەرشتی زیاتر لە 10 هەزار مامۆستادا بە کوردی دەخوێنن. لەو 10 هەزار مامۆستایە نزیکەی هەشت هەزاریان راژەیان لەسەر حکومەتی هەرێمی کوردستانە و نزیکەی دوو هەزار مامۆستا لە بەغداوە مووچە وەردەگرن.

 

بەگوتەی شێرزاد رەشید، وەزارەتی پەروەردەی عێراق دیراسەی ئەو پێشنیازە دەکات کە وەزارەتی پەروەردەی حکومەتی هەرێمی کوردستان بۆ گواستنەوەی راژەی مامۆستایان رادەستیکردوون و دەڵێت: "تاوەکو ئێستا وەڵامێکی فەرمیمان لە وەزارەتی پەروەردەی حکومەتی فیدراڵەوە پێ نەدراوەتەوە، بەڵام کاروبارەکان بەباشی بەرەوپێش دەچن و هیچ بەربەستێک نەهاتووەتە پێشەوە." 

 

بەڕێوەبەری پەروەردەی کوردی لە کەرکووک گواستنەوەی راژەی مامۆستایانی وانەی کوردی لە ناوچە کوردستانییەکانی دەرەوەی ئیدارەی هەرێمی کوردستان دەبەستێتەوە بە بودجەی گشتیی عێراق و پێیوایە: "دەبێ چاوەڕێبکەین بودجەی عێراق پەسندبکرێت بۆ ئەوەی بزانین خوێندنی کوردی لەسەر بودجەی وەزارەتی پەروەردەی عێراق داندراوە یان وەکو بودجەیەکی تایبەت مامەڵەی لەگەڵدا دەکرێت."