ئاڵوگۆڕ لە پۆستی سەرۆکی دادگەی تێهەڵچوونەوەی ناوچەی سلێمانی دەکرێت

 

 

رۆژی سێشەممە 2ی کانوونی دووەمی 2024 دادوەر کامەران حەسەن، گوتەبێژی سەرۆکایەتیی دادگەی تێهەڵچوونەوەی ناوچەی سلێمانی بە هۆرڤان رەفعەت، پەیامنێری رووداوی لە سلێمانی راگەیاند، "ئەمڕۆ بە فەرمی دادوەر جاسم جەزا هەورامی، سەرۆکی دادگەی پێداچوونەوەی سلێمانی دەستی لە پۆستەکەی هەڵگرت و لەبری ئەو، دادوەر عومەر ئەحمەد بووە سەرۆکی دادگەی تێهەڵچوونەوەی ناوچەی سلێمانی بە وەکالەت."

 

گوتەبێژی دادگەی تێهەڵچوونەوەی ناوچەی سلێمانی گوتیشی، "لە 24ی کانوونی یەکەمی 2023 دادوەر جاسم جەزا جافر هەورامی بووە ئەندامی دادگەی پێداچوونەوەی هەرێمی کوردستان و سوێندی یاسایی خوارد، ئەمڕۆ بە فەرمی دەستی لە پۆستی سەرۆکی دادگەی پێداچوونەوەی سلێمانی هەڵگرت."

 

لەبری دادوەر جاسم جەزا هەورامی، دادوەر عومەر ئەحمەد بە وەکالەت دەبێتە سەرۆکی دادگەی تێهەڵچوونەوەی ناوچەی سلێمانی کە سنوورەکانی رانیە، سلێمانی و هەڵەبجە دەگرێتەوە. وەکو دادوەر کامەران حەسەن ئاماژەی پێدەدات، "ئەمڕۆ رێکارەکانی ئاڵوگۆڕکردنی پۆستەکان تەواو دەبێت و لە بەیانییەوە سەرۆکی نوێی دادگەی تێهەڵچوونەوەی ناوچەی سلێمانی دەستبەکار دەبێت."