رووداو دیجیتاڵ
لە رووداوێکی هاتووچۆدا لە رێگەی نێوان مهاباد - ورمێ لە رۆژهەڵاتی کوردستان، کەسێک گیانی لەدەستدا و پێنج کەسی دیکە بریندار بوون.
ئەمڕۆ هەینی، 1ـی کانوونی یەکەمی 2023، لە رێگەی نێوان مهاباد – ورمێ دوو ئۆتۆمبێلی جۆری پیجۆ پێکیاندادا و یەک لە سەرنشینەکان دەستبەجێ گیانی لەدەستدا.
سلێمان فەرازمیهر، بەڕێوەبەری مانگی سووری مهاباد رایگەیاند، "رووداوەکە ئەمشەو روویداوە و بەهۆیەوە یەک لە سەرنشینەکان دەستبەجێ گیانی لەدەستداوە".
سلێمان فەرازمیهر دەڵیت، "پێنج بریندارەکەی دیکە گوێزراونەتەوە نەخۆشخانەی گشتیی مهاباد و ئێستا لەژێر چارەسەری پزیشکیدان".
لەبارەی هۆکاری رووداوەکەش، بەڕێوەبەری مانگی سووری مهاباد گوتی، تیمەکانی پۆلیسی هاتووچۆ چوونەتە شوێنی رووداوەکە و لێکۆڵینەوە دەکەن.
بەگوێرەی ئاماری بەڕێوەبەرایەتیی پۆلیسی هاتووچۆ و رێگەوبانی پارێزگای ورمێ، لە شەش مانگی سەرەتای ئەم ساڵدا لە پارێزگای ورمێ، 25 هەزار و 111 رووداوی هاتووچۆ روویانداوە و بەهۆیانەوە 480 کەس گیانیان لەدەستداوە و زیاتر لە هەشت هەزار و 600 کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ