رووداو دیجیتاڵ
وەزارەتی بەرگریی تورکیا دەڵێت، 16 پێگەی پارتی کرێکارانی کوردستان- پەکەکە ـی لە هەرێمی کوردستان بۆردوومانکردووە.
بەگوێرەی راگەیێندراوێکی وەزارەتی بەرگریی تورکیا کە ئەمڕۆ هەینی ،1-12-2023 بڵاوکراوەتەوە، فڕۆکە و درۆنە جەنگییەکانی سەر بە فەرماندەیی هێزە ئاسمانییەکان، کاژێر 18:30ـی خولەکی ئەمڕۆ، 16 پێگەی پەکەکەیان لە هەرێمی کوردستان بۆردوومانکرد.
لە راگەیێندراوەکەدا هاتووە، "بە مەبەستی لەنێوبردنی ئەندامانی رێکخراوە تیرۆریستییە جوداخوازەکان، نەهێشتنی ئەو هێرش و هەڕەشانەی لە باکووری عێراقەوە دەکرێنە سەر هێزە ئەمنی و خەڵکەکەمان؛ هەروەها بۆ پاراستنی سنوورەکانمان، هێرشە ئاسمانییەکان لە ناوچەکانی مەتین، گارە، خواکوڕک و قەندیل ئەنجامدران."
لە راگەیێندراوەکەدا هاتووە، لە ئۆپەراسیۆنەکەدا 16 پێگە، حەشارگە، ئەشکەوت، کۆگەی چەک و پەناگەی پەکەکە کراوەتە ئامانج و ئاماژەی بەوەش کراوە، رەچاوی ئەوە دەکەن کە لە هێرشە ئاسمانییەکانیاندا "خەڵکی سڤیل، لایەنی دۆست، شوێنە مێژوویی و کولتوورییەکان زیانیان بەرنەکەوێت."
بەگوێرەی دوایین راگەیێندراوی هەپەگە، کە رۆژی 27ـی تشرینی دووەمی 2023، بڵاوکراوەتەوە، گەریلاکانی پەکەکە لە 48 کاژێردا لە ناوچەکانی زاپ و ئاڤاشین لە هەرێمی کوردستان رووبەڕووی هێزەکانی سوپای تورکیا بوونەتەوە و لە ئەنجامدا دوو سەرباز کوژران و سەربازێکی دیکەش برینداربووە.
ئەم شەڕ و پێکدادانە لە چوارچێوەی ئۆپەراسیۆنێکدایە، تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
وەزارەتی بەرگریی تورکیا گیانلەدەستدانی 777 گەریلا و کوژرانی 113 سەربازی سوپای وڵاتەکەی راگەیاندووە؛ هەپەگەش کوژرانی سێ هەزار و 63 سەربازی تورکیا و گیانلەدەستدانی 398 گەریلای راگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ