جێگری سەرۆكی ئەنجوومەنی پارێزگای سلێمانی: زستان تەواو دەبێت دابەشکردنی نەوت ناگاتە ناو شار
رووداو دیجیتاڵ
ئەندامێكی لیژنەی دابەشكردنی نەوت لە سلێمانی رایگەیاند، تائێستا لە سنووری سلێمانی 12 ملیۆن و 213 هەزار لیتر نەوت دابەشكراوە، لە کاتێکدا 110 ملیۆن لیتر نەوتیان پێویستە. جێگری سەرۆكی ئەنجوومەنی پارێزگای سلێمانیش دەڵێت "ئەگەر دابەشكردنەكە بەم جۆرە بێت، زستان تەواو دەبێت، دابەشكردنی نەوت ناگاتە ناو شاری سلێمانی."
سەلام عومەر، ئەندامی لیژنەی دابەشكردنی نەوت لە بەڕێوەبەرایەتیی نەوت و كانزاكانی سلێمانی بە تۆڕی میدیایی رووداوی راگەیاند، دابەشكردنی نەوت لە ناوچە شاخاوییەكانی سنووری سلێمانی بەردەوامە و تائێستا 12 ملیۆن و 213 هەزار لیتر نەوت دابەشكراوە.
سەلام عومەر ئاماژەی بەوەدا کە بە دوو بۆ سێ رۆژ جارێك نەوت دابەش دەكەن. ئاشکرایشی کرد، ئەمساڵ تائێستا زیاتر لە 61 هەزار خێزان لە دابەشكردنی نەوت سوودمەند بوون.
حکومەتی هەرێمی کوردستان بڕیاری داوە بەرمیلێک نەوت بە نرخی پاڵپشت بە 103 هەزار دینار بداتە هەر خێزانێک، بەڵام پرۆسەی دابەشکردنە بە خاوی بەڕێوەدەچێت، بەشێکیشی بەهۆی گلەیی خەڵکە لە نرخەکەی و دەڵێن، زۆر بەرزە.
بەپێی ئاماری حکومەتی هەرێمی کوردستان تاوەکو 21-11-2022 حکومەتی هەرێمی کوردستان زیاتر لە 28 ملیۆن نەوتی دابینکردووە و زیاتر لە 26 ملیۆن لیتری دابەشکردووە، کە 134 هەزار و 244 خێزان لێی سوودمەندبوون.
بەرزان شێخ محەممەد، جێگری سەرۆكی ئەنجوومەنی پارێزگای سلێمانی بە (رووداو)ی گوت: "ئەگەر دابەشكردنی نەوت بەم جۆرە ئێستا بێت، زستان تەواو دەبێت دابەشكردنی نەوت ناگاتە نێو سەنتەری شاری سلێمانی، چەند ساڵێكیشە هەر بەو جۆرەیە."