لە سۆران شەش ئەندامی خێزانێک بەهۆی خواردنی پەنیرەوە ژەهراوی بوون

 

چەند رۆژێک پێش ئێستا، لە قەزای سۆران خێزانێک لەسەر یەکێک لە ئۆتۆمبێلە گەڕۆکەکانی فرۆشتنی بەرهەمە سپیاییەکان چەند کیلۆیەک پەنیر دەکڕن، ئەو خێزانە ژمارەیان حەوت کەسە، شەشیان لە پەنیرەکە دەخۆن و بەهۆیەوە ژەهراوی دەبن و رەوانەی نەخۆشخانە دەکرێن و ئێستا لەژێر چاودێری چڕی پزیشکیدان. 

 

بەنگین ئیبراهیم، دراوسێی ئەو ماڵەیە کە ژەهراویبوون و رووداوەکەی گێڕایەوە و گوتی، "دەڵێن پیکابێک هاتووە و هەندێک پەنیر و ژاژی فرۆشتووە بەو ماڵە ، بەڵام من بڕوا ناکەم چونکە ئەو پیکابە هەر یەک کەس پەنیری لێ نەکڕیوە و خەڵکی دیکەش لێیان کڕیوە بەلام تەنیا ئەو ماڵە پێی نەخۆش کەوتوون، دۆخی تەندروستیان باش نییە." 

 

ئێستا وەرزی خستنە بازاڕی بەرهەم سپیاییەکانە، جگە لە دووکانەکان لەسەر شەقام و کۆڵانەکان لەو بەرهەمانە دەفرۆشران، دوای ژەهراوی بوونی خێزانەکە تەواوی فرۆشیارانی شەقام فرۆشتنی بەرهەمەکانییان لێ قەدەخەکرا و دەست بەسەر بەرهەمەکانیاندا گیرا.

 

حەمرین مینە حەمەد، بەڕێوەبەری تەندروستیی سۆران، رایگەیاند، "سەرەتا سێ هاووڵاتی تووش ببون بەڵام دوایی سێ کەسی دیکەی هەمان خانەوادە نێشانەکانیان لێ بەدەرکەوت ، دۆخی تەندروستیی سێ لەو کەسانەی ئەو خێزانە باش نییە و لەژێر هەناسەدانی دەستکرددان ، بەدواداچونمان کرد بە خواردنی پەنیر وایان لێ هاتبوو ، ئێمەش توانیمان لە رێگەی لیژنەی چاودێری دەست بەسەر ئەو بەرهەمانەدا بگرین کە لە سۆران لەسەر شەقام و ئۆتۆمبێلەکان دەفرۆشرێن و لە تەواوی قەزاکانی سنوری سۆران و دەوروبەری ئاگادارکراونەتەوە کە بەهیچ شێوەیەک رێگە نەدرێت ئەو بەرهەمانە لەسەر شەقامەکان بفرۆشرێن." 

 

سنووری سۆران و باڵەکایەتی و برادۆست ناوچەی دەوڵەمەندن لە بەرهەمهێنانی بەرهەمە سپیاییەکان و ساڵانە کۆچەری رەوەندەکانی ئەو سنوورە دەیان تۆن بەرهەمی سپیایی دەخەنە بازارەکانی کوردستانەوە.