هەفتەیەک بەسەر بانگەشەدا تێپەڕیوە و هیچ سکاڵایەک لە هەڵەبجە تۆمار نەکراوە

 

 

ئەمڕۆ سێشەممە، 1ـی تشرینی یەکەمی 2024، نەبەرد عومەر، بەرپرسی دەستەی هەڵبژاردنەکانی هەرێمی کوردستان لە کۆمیسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی راگەیاند: "ژمارەی سکاڵاکان لەسەر سەرپێچییەکان بۆ 20 سکاڵا بەرزبووەتەوە، کە 9 سکاڵا لە هەولێر، 9 سکاڵا لە سلێمانی و دووانیش لە دهۆک تۆمارکراون، بەڵام لە بازنەی هەڵەبجە هیچ سکاڵایەک تۆمار نەکراوە.

 

نەبەرد عومەر گوتی: "بەشێک لە سەرپێچیکاران لە رێگەی تیمەکانی چاودێری کۆمیسیۆن و شارەوانییەکانەوە سزا راون."

 

لەبارەی یەکلاییکردنەوەی ئەو 20 سکاڵا تۆمارکراوە، نەبەرد عومەر گوتی: "تاوەکو ئێستا هیچکام لەو سکاڵایانە یەکلایی نەکراونەتەوە و هیچ بەربژێر و لایەنێکیشی لەسەر سزا نەدراوە، بڕیارە لە چەند رۆژی داهاتوودا لێکۆڵینەوەکان تەواو بکرێن."

 

دوێنێ دووشەممە، خالید عەباس، بەرپرسی ئۆفیسی دهۆکی کۆمیسیۆنی هەڵبژاردنەکان بە رووداوی گوت، 9 بەربژێر بەهۆی سەرپێچیکردن سزادراون و 41 تیمی چاودێری بەردەوام بە سنوورەکەدا دەگەڕێن.

 

خالید عەباس گوتیشی: "هەر حیزب و بەربژێرێک سەرپێچیی رێنوێنییەکان بکات مۆڵەتی سێ رۆژی پێدەدرێت بۆ لادانی، ئەگەر لاینەدات بە پێبژاردنی 250 هەزار دینار یان زیاتر سزا دەدرێت."

 

هەر دوێنێ سەلام بیلال، سەرۆکی شارەوانیی هەڵەبجە سەبارەت هەڵواسین و دانانی پۆستەرەکان لە شارەکە لە شوێنی رێگەپێنەدراو؛ بە رووداوی گوت: "ئێمە، نامانەوێ یەکسەر فلێکس و دروشمە هەڵواسراوەکان لابدەین، سەرەتا حیزب و بەربژێرەکان ئاگادار دەکەینەوە، ئەگەر لایاننەبرد، ئەوکات ئێمە لایدەبەین."

 

کۆمیسیۆنی باڵای سەربەخۆی هەڵبژاردنەکانی عێراق، بە پشتبەستن بە یاسای ژمارە یەکی ساڵی 1992ـی پەرلەمانی کوردستان ژمارەیەک شێوازی سەرپێچی بانگەشە و جۆری سزای دیاریکردووە، لەوانە:

 

- بەکارهێنانی باڵەخانە حکومییەکان بۆ هەڵواسینی پۆستەر قەدەخەیە.

 

- بەپێی رێنوێنییەکانی وەزارەتی شارەوانی رێگە نادرێت بە دانانی وێنە و پۆستەر لەسەر سەوزایی، نێوان شەقامەکان و نێو پاركە گشتییەكان.

 

- رێگە نادرێت بە هەڵواسینی وێنە و پۆستەرەكان لەسەر هێمای هاتووچۆ و تابلۆ رێنیشاندەرەكان، یان هەڵواسین لە شوێنی سووڕانەوەی ئۆتۆمبێل.

 

سزاکانیش بەگوێرەی سەرپێچییەکان بەم شێوەیە دەبن؛ پێبژاردن کە بەربژێر و حیزب بە پارە سزا دەدرێن؛ دەستگیرکردن هەیە لە مانگێک تاوەکو ساڵێک؛ ئەگەر سەرپێچییەکەش گەورە بێت، ئەنجوومەنی کۆمیسیاران دەتوانێت بەربژێری سەرپێچیکار دووربخاتەوە.