قوباد تاڵەبانی: یەکێتییە دڵسۆزەکان پەراوێز ناخرێن

 

رۆژی یەکشەممە 1-10-2023، قوباد تاڵەبانی، ئەندامی سەرکردایەتیی یەکێتیی نیشتمانیی کوردستان، دوای تەواوبوونی کۆنگرەی پێنجەمی حیزبەکەی پەیامێکی بڵاوکردەوە و رایگەیاند، "ئێستا هەمووان چاودێریی هەنگاوەکانی یەکێتی دوای کۆنگرەی پێنج دەکەن. بۆیە بەرپرسیارێتیی سەرکردایەتیی نوێی یەکێتی لە هەموو کات قورسترە و دەبێت لە ئاستی چاوەڕوانی خەڵکدا بن." 

 

لە پەیامەکەیدا قوباد تاڵەبانی، پیرۆزبایی لە هێرۆ ئیبراهیم ئەحمەد و کۆسرەت رەسووڵ عەلی دەکات کە بە سیمبوولی یەکێتی دیاریکران. هەروەها پیرۆزبایی لە بافڵ تاڵەبانی، سەرۆکی یەکێتی دەکات. 

 

قوباد تاڵەبانی باس لە ئەنجامەکانی کۆنگرە دەکات و دەڵێت، "سەرکەوتوو بوو لەوەی کە یەکێتییە دڵسۆزەکان پەراوێز ناخرێن و هەموومان پێکەوە بڕیارمانداوە خزمەتکاری هاووڵاتییان بین بێ جیاوازی ناوچەیی و حیزبایەتی و ئایینی."

 

کۆنگرەی پێنجەمی یەکێتی رۆژی 27ـی ئەیلوول دەستیپێکرد، لە یەکەم رۆژی کۆنگرەکەدا بافڵ جەلال تاڵەبانی بە سەرۆکی حیزبەکە هەڵبژێردرا. لە کۆتا رۆژی کۆنگرەکەش، دەنگ لەسەر پەیڕەوی نێوخۆی حیزب درا و بەپێی پەیڕەوەکەش 60 ئەندامی کۆنگرەکە وەکو ئەندامی سەرکردایەتیی یەکێتی هەڵبژێردران. 

 

قوباد تاڵەبانی لەبارەی هەنگاوەکانی یەکێتی لە دوای کۆنگرە گوتی، "یەکێتی بە سەرۆکایەتیی بافڵ تاڵەبانی لە ئاست چاوەڕوانییەکانی کۆمەڵانی خەڵکی کوردستان و ئەندامان و جەماوەری یەکێتیدا دەبێت."

 

هەروەها تەلار لەتیف، گوتەبێژی کۆنگرەی یەکێتی دوای تەواوبوونی کۆنگرە قسەی بۆ رۆژنامەڤانان کرد و گوتی، "لە کۆنگرەدا بەهۆی جۆش و خرۆشی ئەندامان، زۆر پێداگری لەسەر هەموو بڕگە و مادەکانی پەیڕەو کرایەوە، ئەوەش ماوەی کۆنگرەکەی بۆ پێنج رۆژ درێژکردەوە".