لە رووداوێکی هاتووچۆدا لە رێگەی دەربەندیخان - سلێمانی پێنج هاونیشتمانی گیانیان لەدەستدا
رووداو دیجیتاڵ
لەسەر رێگەی دەربەندیخان و سلێمانی، لە پێکدادانی دوو ئۆتۆمبێلدا پێنج هاونیشتمانی گیانیان لەدەستدا.
رووداوەکە کاژێر 11:00ی ئەمڕۆ شەممە 01-10-2022، لە نزیک گوندی سیارە روویداوە؛ رێپێدراوی هاتووچۆ محەممەد ئەحمەد لە هاتووچۆی دەربەندیخان بە تۆڕی میدیایی رووداوی گوت: "پێکدادانەکە لەنێوان بارهەڵگرێک و ئۆتۆمبێلێکی تایبەت بووە."
هەر پێنج کەسەکە لەنێو ئۆتۆمبێلە تایبەتەکدا بوون. محەممەد ئەحمەد گوتی: "سێ کەسیان جلی سەربازییان لەبەردایە و پێدەچێت پێشمەرگە بووبن؛ شۆفێری بارهەڵگرەکەش سەلامەتە و بریندار نەبووە."
پۆلیسی هاتووچۆ هێڵکاری بۆ رووداوەکە کردووە و لێکۆڵینەوەی سەرەتایی دەستپێکردووە. محەممەد ئەحمەد گوتی: "تاوەکو ئێستا لایەنی تۆمەتباری رووداوەکەمان دەستنیشان نەکردووە."
هاتووچۆی دەربەندیخان بۆ رووداو : رووداوەکە لەنێوان بارهەڵگرێک و ئۆتۆمبێلێکی تایبەتدا لە نزیک گوندی سیارە روویداوە و بەهۆیەوە پێنج پێشمەرگە گیانیان لەدەستداوەhttps://t.co/WGNMqqO3vD pic.twitter.com/B5DYJtjArj
— Rudaw (@Rudawkurdish) October 1, 2022