نادیە موراد، کچە کوردی ئێزدیی رزگاربووی دەستی داعش و براوەی خەڵاتی نۆبڵ بۆ ئاشتی بەبۆنەی کۆچی دوایی بابەشێخ پەیامێکی بڵاوکردەوە و دەڵێت "کۆمەڵگەی ئێزدی بە کۆچی دوایی بابەشێخ، ئەمڕۆ رێنیشاندەرێکی لەدەستدا".

 

هەر لە پەیامەکەی نادیەدا هاتووە "ئەو سەرکردە رۆحییە ئێزدییە هەموو بەهاکانی ژیری، میهرەبانی و لێبوردەیی لەخۆگرتبوو. بوو بە نموونەیەکی کۆمەڵگەکە [کۆمەڵگەی ئێزدی] و بە خۆشەویستی و رێزەوە مامەڵەی لەگەڵ رزگاربووانی ئێزدی دەکرد. بۆ هەمیشە لەیادمان دەمێنێت".

 

 

بەرهەم ساڵح، سەرۆککۆماری عێراق لە پەیامێکدا بەبۆنەی کۆچی دوایی بابەشێخ، رێبەری رۆحیی کوردانی ئێزدی و دەڵێت، هەڵوێستی نیشتمانی هەبووە لە رووبەڕووبوونەوەی داعش و تیرۆر و هەڵوێستی مرۆڤانەیشی بەرامبەر کوردانی ئێزدی هەبووە. 

 

سەرۆککۆماری عێراق ئاماژەی بەوەشکردووە، بابەشێخ رۆڵی گەورەی هەبووە لە گێڕانەوە و بەخێرهاتنەوەی کوردانی ئێزدی کە لەلایەن داعش رفێندرابوون. 

 

 

ژبۆ وه‌غه‌را خودێ ژێ ڕازى شێخ خرتۆ حه‌جى ئيسماعيل، بابێ شێخ يێ ئێزدييان، به‌هيدارى و سه‌رساخيێ ل مالبات و كه‌سوكارێن وى و هه‌مى خوشك و برايێن ئێزدى دكه‌م و هه‌ڤپارێن خه‌ما وانين، ژ خودايێ مه‌زن هيڤيخوازين جانێ وى ب دلۆڤانيا خۆ شا بكه‌ت و سه‌بر و هه‌دارێ بده‌ته‌ هه‌موويان.

 

بابێ شێخ وه‌ك ڕێبه‌ر و مه‌زنێ ئۆلى يێ ئێزدييان ژيانا خۆ ژبۆ خزمه‌تا ئێزديياتيێ و سالێن دوور و درێژێن ژيێ خۆ د كاروبارێن ئۆلى و جڤاكى يێن ئێزديياندا ده‌رباز كرن، ڕۆلا وى يا به‌رچاڤ ژبۆ پێكڤه‌ژيان و هه‌ڤقه‌بوولكرنێ ژى دياره‌ و شوونده‌ستێ كار و خزمه‌تێن وى، هه‌ر دێ مينيت.

 

وه‌غه‌را وى يا خێرێ و جانێ وى شاد.

 

نێچيرڤان بارزانى

 

سه‌رۆكێ هه‌رێما كوردستانێ

 

1/10/2020

 

 

لە دڵەوە خەمبار و نیگەران بووین بە هەواڵی ژیانئاوایی جەنابی بابەشێخ ڕابەری ڕۆحیی ئێزدیی.

 

بابەشێخ کەسایەتییەکی چاکەخواز و خزمەتگوزار و کۆکەرەوەبوو، ڕۆڵێکی گەورەی دی لەیارمەتیدانی ئێزدییەکان بۆ دەربازبوون لە شۆکی جینۆسایدی داعش، هەموو تەمەنی خۆشی بەخشییە ڕێنمایی و ڕابەرایەتی ئاینیی پەیڕەوانی ئاینی ئێزدی لە سەرانسەری جیھان. 

 

داوکارین لە خودا لەم ماتەمەدا ئارامیی بە هەموو لایەک ببەخشێت و ڕەوانی بەڕێزیان بە بەهەشتی بەرین شاد بکات.

 

 

 

بە داخێکی زۆرەوە هەواڵی کۆچی دوایی بابا شێخ ( شێخ خرتۆ حاجی ئیسماعیل) ڕێبەری روحانیی ئاینی ئێزدییم بیست. پرسە و سەرەخۆشیی لە بنەماڵە بەڕێزەکەی و میری ئێزدیان و ئەنجومەنی روحانیی و تەواوی خوشک و برایانی ئێزدی لە کوردستان و جیهان دەکەم و خۆم بە هاوبەشی خەمیان دەزانم. جەنابی بابا شێخ کەسایەتییەکی دیار و خاوەن پێگەیەکی گرنگ بوو لە هەرێمی کوردستان و جیهاندا . ڕۆڵێکی بەرچاویشی لە پەرەپێدانی بەیەکەوەژیانی ئاینیی لە هەرێمی کوردستاندا هەبوو. خوای مەزن گیانی بە بەهەشت شاد بکات و ئارامی و دڵنەواییش بە هەمووان ببەخشێت. 

 

مەسرور بارزانی

سەرۆکی حکومەتی هەرێمی کوردستان 

2020/10/1

 

رووداو دیجیتاڵ

بابەشێخ کەسایەتیی ناسراوی کوردانی ئێزدی و رابەری رۆحیی ئێزدییەکان، لە تەمەنی 87 ساڵیدا بە نەخۆشی کۆچی دواییکرد. بە گوتەی بەڕێوەبەری کاروباری کوردانی ئێزدی لە دهۆک، رابەری رۆحیی ئێزدییەکان نەخۆشیی گورچیلەی هەبووە.

خێری بۆزانی، بەڕێوەبەری گشتیی کاروباری کوردانی ئێزدی لە وەزارەتی ئەوقاف رایگەیاند، بابەشێخ لە نەخۆشخانەیەکی هەولێر گیانی لەدەستداوە و مردنی ئەو کەسایەتییەش "کەلێنێکی گەورە" لە جڤاتی بڵندی رۆحانی و سیستەمی ئایینی ئێزدییان بەجێدەهێڵێت.

جەعفەر سمۆ، بەڕێوەبەری کاروباری کوردانی ئێزدی لە دهۆک بە تۆڕی میدیایی رووداوی راگەیاند، بابەشێخ لە نەخۆشخانەی سەردەم لە هەولێر کۆچی دواییکردووە.

بەڕێوەبەری کاروباری کوردانی ئێزدی لە دهۆک رۆژی چوارشەممە 30ی ئەیلوولی 2020 بە تۆڕی میدیایی رووداوی راگەیاند، سێ رۆژە رەوشی تەندروستیی بابەشێخ خراپە و لە رۆژی سێشەممە 29-9-2020ـەوە لەژێر چاودێریی چڕدایە.
 
بابەشێخ کە ناوی تەواوی شێخ خرتۆ حاجی ئیسماعیلە، رۆڵێکی باڵای هەبوو لە دەرکردنی رێنمایی ئایینی بۆ وەرگرتنەوەی ئەو کچ و ژنە ئێزدییانەی کە لە ساڵی 2014 کەوتنە دەست رێکخراوی داعش.