شاندێكی کەنەدی کەمپەکانی رۆژئاوای کوردستان بە گوانتانامۆی ئەمریکا دەچوێنێت

 

رۆژی پێنجشەممە، 31-8-2023، شاندێک لە چالاکڤانانی سڤیل سەر بە رێکخراوێكی ناحکومی لە ئۆتاوای پایتەختی کەنەدا راپۆرتێكیان لەسەر دۆخی ئەو کەنەدیانە بڵاوکردەوە کە لە کەمپەکانی هۆل و رۆژن لە رۆژئاوای کوردستان. شاندەکە ئەو کەمپانە بە کەمپی "گوانتانامۆ"ی ئەمریکا دەچوێنن، کە تایبەت بوو بە زیندانیانی رێکخراوی قاعیدە.

 

راپۆرتەکە لە دوای سەردانێکی شاندێكی رێکخراوەکە بۆ رۆژئاوای کوردستان ئامادەکراوە و تێیدا هاتووە: "ئێمە وەک رێکخراوی ناحکومی زانیاریمان هەیە کە نۆ هاووڵاتی کەنەدی لەسەر بنەمای پەیوەندیکردن بە داعشەوە لەو کەمپانەدا دەستگیرکراون، قسەمان لەگەڵ دووانیان کرد. ئەوان چەند ساڵێکە بەبێ هیچ دادگاییکردنێک دەستگیرکراون، نە رێگەیان پێدراوە پەیوەندی بە خێزانیانەوە بکەن و نە مافی وەرگرتنی پارێزەر و سەردانی شاندی کۆنسوڵخانەی کەنەدایان هەبووە".

 

بەگوێرەی راپۆرتەکە: "ئەوانەی لە کەمپەکانی ژێر دەستی هێزەکانی سووریای دیموکراتن، لە بارودۆخێكی زۆر خراپدا دەژین، لەوێ هەزاران کەس بەبێ هیچ لەبەرچاوگرتنی مرۆیی دوور لە یاسا مامەڵەیان لەگەڵدا دەکرێت."

 

شاندەکە داوای لە حکومەتی کەنەدا کردووە ئەو نۆ چەکدارە بگەڕێنێتەوە وڵات و دەڵێت هەوڵەکانی حکومەت نابێت تەنیا ژن و منداڵەکان بگرێتەوە.

 

رۆژی 8-4-2023، کەنەدا 10 منداڵی لە کەمپی هۆل گەڕاندەوە، لە تشرینی یەکەمی ساڵی پار دوو ژن و دوو منداڵ و  لە 2020-یش کچێكی تەمەن 5 ساڵی بێ دایکوباوکی گەڕاندەوە.