رووداو دیجیتاڵ
تەرمی گەنجێکی دانیشتووی قەزای دەربەندیخان دوای 22 رۆژ لە گیانلەدەستدانی لە ئیتاڵیا بەهۆی ئەوەی کەوتبووە ژێر شەمەندەفەر، گەڕێندرایەوە هەرێمی کوردستان و بەخاک سپێردرا.
گەنجەکە ناوی چیا قارەمان بوو و خەڵکی قەزای دەربەندیخان بوو، ئەو لەگەڵ هاوژین و منداڵەکانی چووبوونە ئەورووپا. تەرمەکەی ئەمڕۆ (پێنجشەممە، 01-08-2024) لەلایەن رێکخراوێکی تایبەت بە کاروباری ئاوارە و پەنابەران گەڕێندرایەوە هەرێمی کوردستان.
ئەو هاونیشتمانییە ویستبووی لەگەڵ هاوژین و سێ منداڵەکەی بە شەمەندەفەر لە ئیتاڵیاوە بچنە فەرەنسا، بەڵام لە رێگەدا تووشی ئەو کارەساتە بوو.
سلێمان سەعید، قایمقامی دەربەندیخان لەو بارەوە بە رووداوی گوت، "چیا لەگەڵ هاوژین و منداڵەکانی سواری شەمەندەفەرەکە بوون، بەڵام بەر لەوەی بەڕێبکەوێت، منداڵەکانی داوای ئاویان کردووە و ئەویش دابەزیوە؛ کە ئاوی بۆ هێناون، بینیوێتی شەمەندەفەرەکە کەوتووەتەڕێ، چیا هەوڵدەدات بچێتە نێو شەمەندەفەرەکەوە، بەڵام بەداخەوە دەکەوێتە ژێر شەمەندەفەرەکە و گیان لەدەستدەدات."
گوتیشی، ''ئەو گەنجە خزم و پاسەوانی تایبەتیی من بووە و، ماوەی 16 ساڵ لە هێزەکانی نێوخۆدا کاری کردووە.''
ماردین حەمید، بەرپرسی بەشی راگەیاندنی دەزگای لووتکە بۆ کاروباری ئاوارە و پەنابەران بە هونەر حەمید، پەیامنێری تۆڕی میدیایی رووداوی گوت، لە ماوەی حەوت مانگی رابردوودا، لانیکەم 35 هاووڵاتی و هاونیشتمانیی عێراق و هەرێمی کوردستان، بەهۆی کۆچی نایاسایی گیانیان لەدەستداوە، کە ''رێکاری گەڕانەوەی تەرمەکانیان کاتی پێویستە و تاوەکو ئێستا دیار نییە کەی تەرمەکان دەگەڕێندرێنەوە.''
ماردین حەمید گوتیشی، ''سەرجەم ئەو کەیسانەی لای ئێمە تۆمار کراون، بە کراوەیی ماونەتەوە و هەوڵدان بۆ گەڕان و زانینی سۆراخێک لەسەر قوربانیانی کۆچی نایاسایی، بەردەوامە. ئەو تەرمانەی لە ماوەی رابردووشدا لەلایەن دەزگای لووتکەوە گەڕێندراونەتەوە، لەسەر داواکاریی کەسوکاریان بووە.''
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ